Dayîka Rojnameger Nazim Babaoglû ke serra 1994 de amebi qetilkerdiş, Makbûle Babaoglû wefat kerd.
Makbûle Babaoglû ke 80 serrî bî bi sebebê nêweşîya gurçike, keyeyê xo yê Peyasa Amedî de weşîya xo kerd vinî. Dayîka Makbûle maya muxabirê Rojnameyê Ozgur Gundemî Nazim Babaoglû ke serra 94 de qezaya Riha Sêwereg de hetê dewleta Tirk amebi remnayîş û dima ra amebi qetilkerdiş a. Makbûle Babaoglû Mezelê Yenîkoy de amê definkerdiş.
Makbûle Babaoglû ke tewrê çalakîya Mayanê Şeme bî zey xeylê dayîkan verîya ke esteyanê lajê xo bivîno weşîya xo kerd vinî. Babaoglû jû çalakîya Mayanê Şeme de hêrs û nêrazîbîyayîşê xo bi nê vatenan ardbî ziwan: "Ez kesê ke dewlet îdare kenê ra pers kena, şima dê verîya ke esteyanê lajê mi bidê mi, senî aşitî virazê? Bi ma ra nimitişê esteyanê domananê ma şima dê senî haştî virazê?"
DÎHABER/AMED