SADÎYE ESER / MA / STENBOL
Dayîkê Şeme 22 serrî yo ke bêmaben Rasteyê Galatasarayî de aqubetê merdimanê xo yê vînîbîyayeyan pers kenî. Nê dayîkan ra yewe zî dayîka Hayrettîn Erenî Elmas Erene ya.
Dayîke Elmas Erene û kênaya aye Îkbale Erene qala hîkayeya xo kerdî. Dayîke dîyar kerde ke 21ê Teşrîna verêna 1980î de lajê aye seba ke embazê xo bivîno vejîyayo. Dayîke bi waştişnameyêkî xo resnena Kenan Evrenî la kaxitê ke bi îmzeyê Evrenî tepîya yenî dayîke rê, ewja de seke henekê xo bi dayîke bikerî, vanî ‘ma zî Hayrettînî gêrenî, eke şima zanî, ma ra vajênê’. Dayîke weçînayîşê 2011î ra ver waştişê xo Erdogan rê zî vana, labelê o wext ra nata ti kes persê dayîke nêkeno. Dayîke vana ‘37 serrî yo ke ez nê dejî ancena, wa Homa nêdo ti kesî’. Waye Îkbal Erene zî 37 serrî yo ke bi hesreta birayê xo cuyena û dîyar kena ke tewr peynî roja ke vînîbîyo ê yewbînan dîyî, la dima ra ti xebere birayê xo ra nêgirewto.