ZUHAL ATLAN MA/ŞIRNEX Cinîya bi nameyê Husna Arslana ke dayîka 8 domanan a, heta nika xeylê dejî antî. Domananê aye ra Saît û Hacer cêrzemînê Cizîrî de hetê dewlete ra yenî qetil kerdene. Dayîke Arslane cenazeya Saîtî gêna, labelê hîna zî paweyê cenazeya Hacerî ya. Dayîke 13 serreyîya xo de zewijîyena û domananê xo bi kedêka girde pîl kena. Wextê qedexeyê tebervejîyayîşê kuçeyan de birayê Arslane Selîm û domanê aye Saît û Hacere yenî qetil kerdene. Arslane hîna tazîyeya Selîmî nêqedîyayo, musena ke domanê aye Hacer û Saît cêrzemînêkî de birîndar bîyî. Badê ke qedexe wedarîyeno, dayîke Arslane seba teşhîskerdişê cenazeya kênaya xo, şona Riha. Wexto ke cenazeyan ra ewnîyena, cenazeya lajê xo vînena. Dayîke dîyar kerde ke aye bi hawayo kirantişî şîya cenaze ser û wina va: “Wexto ke ez ewnîyaya, mi dî ke Saît o. Mi didananê ci ra şinasna. Labelê ez xeriqîyaya. Herçiqas ke mi zana Saît o zî, mi nêşêna qebul bikera. O wext mi soz da Saîtî. Mi va ‘Baro ke to girewt milê xo, gere ez bigîra milê xo ser, eke ez çuwa reyde rayîr şêra zî, ez do nê barî bikirêşa’.” Ez paweyê ya kênaya xo ya Arslane seba dîyayîşê cenazeya kênaya xo, bi desan reyan nimuneya gonîye dana, labelê heta nika nêdîya. Arslane wina dewam kerde: “Ez paweyê cenazeya kênaya xo ya. Ez zana ke aye sax nîya. Beno ke binê TOKÎyan de menda. Dejo ke ez 3 serrê peyênan de ancena, yê temamê emrê mi ra zêdeyêr o.” Arslane wextê qedexeyî de nizdîyê 40 rojî nane nêwerde û sereyê xo nêşiwitbî. Netîce de 30 kîlo daybî. Arslane seba ke sozê xo bitepişo, Hemserekîya DBPyî ya qeza kena.

Yê ke bi pere kar kenî, pîr nîyî

Îdarekarê Yewîya Elewîyanê Balikkesîrî Vedat Tektenî derheqê meaşgirêdayîşê îqtîdarê AKPyî yê pîranê elewîyan de qisey kerd û hişyarîyê muhîmî kerdî. Tektenî va ‘bawerîya elewîtîye tarîx ra nata dewlete ra durî vindenî’ û wina domna: “Eletîwîye hem hetê kulturî de hem zî hetê sîyasî û komelkî de bi destê pîran estena xo domnayo: “Dewlete rêxistinîya elewîyan ya mabênê serranê 1988 û 93î ferq kerde. Dewlete seba ke elewîyan asîmîle bikera, hewl daye ke pîranê elewîyan bigîro hetê xo. Dewlete zana ke pîrî problemê ekonomîke ancenî.” Tektenî dewamê qiseykerdişê xo de wina va: “Çi heyf ke tayê kesê ke xo sey pîrî şinase kenî, yenî kayanê îqtîdarî û ewro qesranê îqtîdarî de luqmeyo heram wenî. Ma heta nika nêbîyî pîrê îqtîdarî û ma do nika ra pey zî nêbî. Pîrê ke nê îqtîdarî ra meaş gênî, luqmeyo heram wenî. Yê ke wina kenî, wa qala rizatîye nêkerî. Yê ke ê luqmeyî wenî, nefesê înan lêmin o. Bi nefeso lêmin, cem nîno dîyar kerdene.” ÎRHA/STENBOL

Erdlerz ver 300 kesî birîndar bîyî

2 rojî verê Rojhelatê Kurdistanî de erzlerz virazîyabi. Walîyê bajarê Kirmanşanî Huşeng Bazvandî derheqê netîceyê erdlerzî de melumatê muhîmî dayî. Goreyê melumatê Bazvandî netîceyê erdlerzî de 287 kesî birîndar bîyî û zafaneyê birîndaran nêweşxane ra vejîyayî. Ame musayene ke bajar û eyaletan ra girêdaye tayê dewan de xisar virazîyayo. Goreyê melumatan pêro pîya 43 dewî û 101 cayê ke merdimî tede cuyenî de xisarê cîya-cîyayî bîyî. Erdlerzo ke Teşrîna 2017î de Kirmanşanî de bi ver 620 kesî merdbî û 12 hezar kesî zî birîndar bîybî. O wext Başûrê Kurdistanî de zî 8 kesî merdbî. Nê erdlerzî ver bajarê Roydarî de erdlerzêko ke şîddetê ci 5.7 bi, ame cuyayene. ANF/KIRMANŞAN