Lajê Besîle Narîne Alî Narîn (Dilşad Amed) 2013 de wexto ke vera çeteyanê DAIŞî de şer kerdêne, şehîd kewt. Besîle o wext seba ke cenazeya xo bigîro, nizdîyê 10 aşman têkoşîn daye. Netîceyê têkoşînê xo de cenazeya xo girewte û defin kerde.
Besîle na rey zî vera hêrişê ke kerraya mezelê lajê aye rê benî de têkoşîn dana. Seke yeno zanayîş çend rojî verê kerrayê mezelanê YPSyîyan ameybî şikitiş. Labelê yê Narînî nêame şikitiş, tena yewna kerraya ke tena nameyê ci û peynameyê ci ser o nuştêne, kerraya verêne ser o ameye dusnayîş. Dayîke Besîle Narîne babete ser o qisey kerde û reaksîyon nîşan daye.
Dayîke va ‘hêrişê ke vera erjê kurdan de benî, nînî qebulkerdiş’ û wina dewam kerde: “Sey her keyeyê şehîdî, mi zî bi waştişêko gird kerraya mezelî ya lajê xo da viraştiş. Kerra ser o name, peyname, nameyê kodî û bin de zî şîîrêk estbî. Reyna resmê lajê mi ser o estbî. Ez senî pêhesîyaya ke kerrayê mezelî ameyî şikitiş, ez şîya goristan. Yê lajê mi nêşiknaybî, sewbîna kerra ser o dusnaybî. Ma nê nefretî fam nêkenî.”
Heqê înan çîyêko winasî rê çin o
Dayîke dewamê qiseykerdişê xo de wina va: “Nê hêrişî nêşênî îradeya ma bişiknî. Ganî şarê kurd wayîrê erjanê xo bivejîyo. Lajê ma rayîrê heqîqete de canê xo dayî û cok ra ê şehîdê ma yî. Ti kes nêşêno na raştîye bibedilno. Na neheqîyêka girde ya. Ma nêwazenî ke aye kerra ewja de biba. Ma do aye kerrayan bironî cayê înan. No sey dayîke wezîfeyê min o.”
JINNEWS/AMED