SEMRA ACAR - SEVÎM KAHRAMAN/ PÎRHA/ERZÎNGAN
Fatma Derîna 72 serreyî heta nika bajaranê Bursa û Dêrsim de cuyaya û nika zî dewa Tepecîkî ya ke girêdayeyê Erzînganî ya de cuyena. Dayîka Fatma zimistanî şona Bursa û hamnanî zî Erzîngan de manena.
Dayîke dewe de mehsûlanê cîya-cîyayan resnena û nê mehsûlan seba zimistanî wişke kena. Babete ser o dayîke qisey kerde.
Dayîke va ‘ez wisarî ewil bexçeyê xo çape kena û dima ra firingî, îsot, balcan, hindî û sewbîna zaf çîyan ronena’ û wina dewam kerde: “Seba ke heywanê mi çin î, ez heme wextê xo bexçeyê xo de derbaz kena. Ez wisarî bi kedêka girde mehsûlanê xo ronena û payîzî zî nê mehsûlan seba zimistanî wişke kena û erşawena domananê xo rê.”
Ma çîyanê haziran nêwenî
Dayîke wexto ke firingîyê ke wişke kena têmîyan kena, yê ke sîya bîyî, tira vejena. Dayîke wina domnaye: “Ez yê ke sîya bîyî, erzena. Çimkî nêyî seba ke sole nêdîyî, sîya benî. Eke ez nêveja do ê bînî zî xira bibî. Ez firingîyanê wişkan zimistanî dekena mîyanê werdî. Bi no hawa werd hîna beno lezetin. Ma çîyanê haziran nêwenî.”
Dayîke tena sebze nê, eynî wext de meyweyê sey erîk, saye û sewbîna zî wişke kena û kena rîçal û xoşaf.