Hêrişê dagîrkerîye yê artêşa Tirk û çeteyanê ci ver heta nika bi sehezaran merdimî mecbûr mendî ke koç bikerî. Nînan ra yewe zî Dayîka Fexrîye ya. Keyeyê dayîke ser o bomba yenî varnayene û dayîke bêçare koç kena, labelê wextê bombardûmanî de domanê aye binê enkazî de manenî.
Dayîka 80 serrî wazena ke meyîtanê domananê xo bigîra. Dayîke dîyar kena ke teyarayanê artêşa Tirkî înan ser o bombeyî varnayî û da zanayene ke netîceyê bombardûmanî de 2 domanê aye şehîd bîyî. Dayîka ke nika Hesekê de mektebêkî de cuya xo domnena û wina vana: “Ez çend rojî verê Serêkanîyê ra ameya. Teyarayê artêşa Tirkî bêmabên Serêkanîyê ser o bombe varnayî. Netîceyê bombardûmanan de 2 domanê mi binê enkazî de mendî. Ez nika nêşêna şêra ewja.”
Dayîke dewamê qiseykerdişê xo de vana ‘dewleta Tirkî ma ra çi wazena?’ û wina dewam kena. “Bi seyan domanî ameyî qetilkerdene. Mal û keyeyê ma talan kerdî. Wa Homa belayê înan bido. Serêkanîyê de cuya ma zaf baş bîye. Labelê dewleta Tirkî heme mal û milkê ma talan kerdî. Ma dewletanê dinya efû nêkenî. Ê zî bîyî hemparê komployanê ke netîceyê ci de bi hezaran sivîlî merdî.”
ANHA/HESEKÊ