Vera tecrîdê serê Rayberê Şarê Kurdî Abdullah Ocalanî de çalakîyê grevê vêşanîye û çalakîyê destekdayîşî dewam kenî. Bitaybetî dayîkî seba ke piştî bidî çalakîya domananê xo nobete tepişenî û wextê çalakîyan de raştê derb û îşkenceyê polîsan yenî.
Şaîr Rênas Jîyanî zî bale ant xoverdayîşê dayîkan ser û dîyar kerd ke dayîkê xoverdayoxî sey şîîran î û ê waştişê xo de heqdar î. Şaîr Jîyanî da zanayene ke o bawer keno ke dayîkî do qezenç bikerî. Jîyanî va ‘kam ke nê waştişê dayîkan fam nêkero û ganê înan bidejno, wa bizano ke qet sernêkeweno’ û wina domna: “Ma çîyê ke dayîkan rê yenî kerdene ver, zaf xemgîn î. Her kam ke vajo ez merdim a û vera nê kerdişan de bêveng bimano, ma nêşênî ci rê vajî merdim. Ganî merdim cuyayîşanê dayîkan hîs bikero û înan rê rêz bigîro.”
Jîyanî dewamê qiseykerdişê xo de va ‘ê ke nêşonî hawara dayîkan û piştî nêdanî dayîkan, wa merdimîya xo ra şik bikerî’ û wina qedêna: “Beno ke fikir û vînayîşê merdiman cîya bibî. Heta beno ke fikrê merdimî qarşîyê nê fikran de bibo. Eke merdimî seba azadîye kewtîye rayîr, o wext ganî herkes çalakîya înan rê rêz bigîro û çi destê ci ra bêro, bikero.”
MA / RIHA