Nê 34 serra ke wendekarê zanîngehî têkoşîn danî ke YOK bêro hewanayîş û wendekarî qet sazîya darbeyî qebul nêkenî.
Raşteyê fikrîyayiş o
Babete ser endamê Komeleya Wendekarê Serra Seserre (YODER) û wendekarê beşa Televîzyon û Radyoyî Welat Demîr vat ke çi heyf ke bi makeqanûnê darbeyî hema zî zanîngehê Tirkîya û Kurdistan de polîs û qerakolî est î û YOK qet fikrîyayîşo azad nêhesipnena û wina vat: “Ma nêwazenî zanîngehî yew cayî ra girêdeya bibî, çimkî zanîngehê raşteyê fikrîyayîşo azad î. Zey YOK sazî netîceya polîtîkayê şer î û YOK ser zanîngehan polîtîkayê lêmin ê şer şuxilnena.”
Polîtîkayê ajankerdişî
Komeleya Wendekarê Serra Seserre (YODER) Şeref Pala zî aşkera kerd ke YOK taybetê wendekarê kurd ser polîtîkayêko taybet şuxilnena, armancê YOKe zî wendekarê kurd ajanê xo kerdiş o û wina domna: “Seba ajantîye zî taybetê wendekarê kurd ê feqîr yenî weçînayîş, la no polîtîkayî înan zî qet armancê xo ra zî nêreseno. Wendekarekî eke teklîfê ajanîya polîsî qebul nêkero, no demî polîs dest pê gefwendişê keno. Eke yew embazê ma teklîfê polîsî qebul nêkero, no demî polîs serê ci sûcê lêmin erzeno û peynî zî ajantîye dano zorî.”
YOK û dewlet eynî yî
Hewna wendekarê Zanîngehê Serra Seserre Sedat Yikin zî aşkera kerd ke merdim bîyayîşê YOKe merdim nêeşkeno dewlete ra cîya bigêro û wina dewam kerd: “YOK fikrê kapîtalîstan bî, la bi têkoşînê wendekaran YOK serkewt nêbî. Taybetê Kurdistan de ser zanîngehê polîtîkayê taybet ê YOKe estî. Ganîyo her wendekar polîtîkayê YOKe ser bifikrî û cipersî.”
Sazîya burjuvazîye
Wendekarê Zanîngehê Stenbolî Elîf Orgun îzeh kerd ke bi YOKe perwerde nika destê sermeyayî de yo. Wendekarê Beşa Huqiqî ya Zanîngehê Stenbolî Fulya Dagli zî ciresna ke seba îfadekerdişê cenîyan şerto ke YOK bêro hewanayîş. Tewr peynî zî wendekarê beşa huqiqî Kubra Okumuş zî bal ant ser perwerdeyo bêpere û destnîşan kerd ke ganîyo ke êdî zanîngehan de pergalê xorayîrberdişî bêro înşakerdiş.
STENBOL / WAN
Polîs hêrîşê çalakîye kerd
Semedê ke serrgêra awanbîyîşê YOK protesto bikerî wendekarê Zanîngeha Stenbolî vernîya Fakulteya Edebîyatî de amey têhet û verba Raşteya Beyazitî ra kewtî rayîr û waştî ke çalakîya meşîyayîşî bivirazî. La polîs vernîya wendekaran girewt û zaf hûmarî de wendekaran bi debkerdişî girewt bin çimî. Polîsî xo nêgirewtî û karta ke qirika muxabîra Bîanetî Beyza Kuralî kaş kerd û qerfnay. Bade zî bi awayo çep kelepçe da destanê ya ro û girewtî binçim. Ame dîyîş ke polîs wexto ke mudaxaleyê wendekaran kerd, bi vengekî berz vat ‘Êdî nika ra pey heme çî bedilya. Beyza Kural bade serbest amey veradayîş.”
JINHA/STENBOL