Doza Hemserekê Pêroyî yê HDPyî yê verên Selahattîn Demîrtaşo ke 4ê teşrîna peyêna 2016î ra nata tewqîfkerde yo, Anqara de dest pêkerde. Demîrtaş bi rayîrê telekonferansî (SEGBÎS) beşdarê doze bi.
Demîrtaşî dîyar kerd ke o mecbûr mendo ke bi telekonferansî pawitişê xo bikero û wina va: “Ameyîş û şîyayîşê ma yê Anqara qasê 24 saetan dewam keno. Seba ke weşîya mi baş nêbîye, mi telekonferans qebul kerd. Wa bêro zanayene.”
Demîrtaşî qiseykerdişê xo de wina va: “Mi şar pawit û bindestî pawitî. Tayê partîyê muxalefetî wina nîşan danî ke seke krîz xafila ameyo. Labelê wina nîyo. Tayê partîyî vanî ‘ma eynî keştîye de yî’. Ez zî namzedê Serekkomarîye bîya. Labelê ez eynî keştîye de nîya. Ez keştîya feqîran de ya. Ez keştîya talankeran de nîya. Keştîya înan rind a û ê awe de nêşonî. Cok ra ma eşnî keştîye de nîyî. Eke mi bişênayêne qala nêyî bikerdêne, o wext do cîya bibîyêne. Hîleyo tewr gird, zîndan de verdîyayîşê min o. Ganî dişmenê merdimî merd bo, labelê nê namerd î.”
Heta 142 serran cezaya zîndanî yena waştene
Demîrtaş bi îdîayanê ‘Rêxistina terorî awan kerdene û îdare kerdene’, ‘propogandaya rêxistine kerdene’ û ‘pesnê suc û sucdarîye dayene’ ra yeno mehkeme kerdene û seba Demîrtaşî heta 142 serran cezaya zîndanî yena waştene.
ANF / ANQARA