Demîrtaş û heyeto ke ey de bi Endamê Meclîsî û Hetkarê Sekreterê Pêroyî de pêvînayîş kerdû dima ra pîya şîy Cadeyê Lîse de yew beyanat da çapemenî.
Hemserekê DBP Kamuran Yuksekî ewil qiseykerdiş kerd û va “Hemserekê Şaredarîya Bajarê Girdî yê Amedî Gultan Kişanake û Firat Anli bi hewayo bê huqûqî ameyî tepiştiş” û waşt wa ca de serbest bêrê veradayîş.
‘Îdîayî pêro zur ê’
Dima ra Hemserekê HDP Selehattin Demirtaşî yew qiseykerdiş kerd. Demîrtaşî wina va “Brêz Kişanake û Anli semedo ke wa aştbî bibo îmkanê şaredarî seferber kerdî. Kes nêeşkeno vajo şaredarîya Amedî desteg daya şidet, sîleh û terorî. Eke şima qayîlê şaredarîyêk sucdar bikerê biewnêne şaredarîyanê xo ra. Biewnêne Şaredarîya Anqara û Îstanbul ra. Biewnênê Kadîr Topbaş û Melîh Gokçekî ra. Eke şima ispat bikerê ke pereyê şaredarî şîyê ko û PKK neke Firat Anli û Gultan Kişanake ma pêro îstîfa kenê. Çîyê ke yenê îdîakerdiş pêro zûr ê. Wina yew çî çin o."
‘Ganî şima heqê ma yo ke xesp kerdo peyser bidê’
Demîrtaşî îzah kerd ke, heta ke Hemserekê Şaredarîyan peyser bêrê wezîfeyê xo ser mücadeleye înan dewam keno û wina va “Şima bi tayînkerdişê qeyûman îradeyî şarî xesp kerdo. Ma nika raştê b huqûqîyêka pîle yenê. Polîsan dorûverê şaredarî girewto û nêverdenê wa kes nêzdîyê ci bibo. Xora qanûnê ke estê demokratik nîyê. Nika meydan de neheqîyêka pîle esta.”
‘Ma wazenê wa serbest bêrê veradayîş’
Demîrtaşî dewamê qiseykerdişê xo de wina va “Semedo ke wa sîleh û şîdet mabên ra wedarîyê, hemşaredarî nêrê tepiştiş û pêameyîş bibo ma zaf xîret kerd. Wexto ke hukmatî OHAL îlan kerd va ‘ma semedê serekê şaredarîyan OHAL îlan nêkerdo.’ La ma nika vînenê ke înan OHAL semede derbekaran ney, semede serekê şaredarîyan îlan kerdo. Ma şarê xo ra wazenê wa 81 bajaran de heqê xo yê protestokerdişî bixebitnê. Ma wazenê wa Hemserekê Şaredarîya Amedî ca de serbest bêrê veradayîş.”
AMED