Nika rojdem çormeyê çêkûyanê ‘derbe’ û ‘OHAL’ de çelqiyena. Şarê Tirkîye çiqe ferqê ci de yo nêzana la şarê kurd û çormeyê mûxalîfeta demokratîk zanê ke nê hurdî çêkûyî çiqe weşîya înan dîrek eleqedar kenê. Tirkîye jû rojî de açarnîya gola gonîn û kaosî. Hikûmet û artêş, polîs û lejkerî, şar û lejkerî, çeteyî û welatijî amey pêver. Vanê ya; ‘Destê kê tûnika kamî de yo dîyar nîyo.’
Wexto ke behsê derbe ame kerdin dîmenê kiştoxê bi hezaran kesan Kenan Evreno ke televîzyonî de cûnta îlan kerd, kuçeyê veng, tanqê lejkerî û girotxaney amey vîr dê mi. Çike ez bi xo nêbîya şahîdê derbeyekê. Heta 15ê Tîrmehî. Bado ke vatî Tirkîye de derbe bena mi heta seatanê sodir hewn nêkerd û bîyayişan taqîp kerd û hewl da ke fehm bikera ke ka derbe çîyekê senîn o. Sermîyananê hikûmet aşkere kerdî ke hedefê derbekaran (Konseyê Welatî de Sûlh) de ‘temsîlîya sîyasî yê dewlet’ hikûmet estbî. La bîlançoyê giran de xeynî hikûmet herkesî zerar dî.
Heta nika netîceyê bîyayişan de 15ê aşmê ra na het (goreyê îstatîstîkanê fermî) 241 kesan weşîya xo kerd vinî. 1530 kesî bî dirbetin û nezdîyê 10 hezar kesî girotîyayî bin çiman. Nezdîyê 9 hezar kesî wezîfe ra amey eştiş. Hona zî operasyonê binçimkerdiş, tepiştiş û wezîfe ra eştiş ramenê. Nayî ra îstatîstîkî her deqe û seat vûrnîyenê.
Rexmê no bîlançoyê giran AKP vengê vejyayişê kuçeyan dana welatijan û meydanan de ‘roşanê demokrasî’ bimbarek kena. AKP hewldayena derbe açarna zey firsetî û destpa operasyonê tesfîyeyê mîyanî kerd. Xo ra goreyê vatişan Erdogan û hikûmet hewldayena derbe verî ra pêhesyay bî û hadreyîna xo verî ra kerdbî. Xo ra her çî zey tîyatroyekê ke senaryoyê ci verî ra amebi hadre kerdin qewimya. Hikûmeta derbekar xo zey mexdûr damûsna û şarî kirêşna kuçeyan. Nika zî veng danê vanê ke wa herkes tifing û kardîyê xo bigîrê û bivejyê kuçeyan. Eynî hikûmet Hemserokê HDP S.Demîrtaşî rîwalo ke 7-8ê Cotmeha 2014î de wextê xoverdayişê Kobanê de silayînê meydanan kerd mahkeme kena. Xêlê nakokî û persî estê. Kam derbekar o, kam mexdûr o kerdî têtewr. La çiyekê zelal esto ke hurdî cepheyî zî derbekar û dîktatorî yê. AKP bi xo 7ê Hezîran de dûştê îradeyê şaran derbe viraşt û netîceyê weçînayinan îptal kerd. Weçîntayişanê 1ê Mijdarî de zî derbe dewam kerd. La nika zî zey hewarîyê demokrasî vejyayê meydanan kam ke AKPyij nîyo hedef gênê.
Derbeya esasî neyra tepya destpa kena. Serva sîstema serokîn kayekê zaf talokeyî vistî dewre. Serva ke na sîstem ronê her çî û herkesî şenê feda bikerê. Xo ra gama sifteyîn eştî û badê kombîyayişê MGK û Desteyê Wezîran, rewşê awarte yanî OHAL îlan kerdî. Erdoganî OHAL zey mijdanî beyan kerd. OHAL yeno na mane ke bê destûrê hikûmet mirîçik zî nêşena biperro. Yanî dê civakî bigîrê bin serdestîya xo.
Şarê kurd zaf rind zano ke OHAL yeno çi mane. Çike Kurdistan de mavêna serranê 1987-2002 de rewşê awarte estbi. Wexto ke behsê OHAL beno kiştiş, merdiş, goçkerdiş, tepiştiş, veşnayiş yeno mezgê kurdan. Nameyê bîn yê rewşê awarte herbê qilêrîn o. Çike 15 serran mîyan de rîwalê OHAL çehar hezarî dewê kurdan amey veşnayen, veng kerden. Çehar mîlyonî kurdî bi zorvajî amey tehcîrkerden. 33 hezar welatijî amey kişten, nînan ra nezdîyê hezarê ci binçiman de amey vindîkerden. Nayî ra mexdûrê tewr gird yê derbe û OHALî kurdî yê. Yê ke heta nika nînan ra dûr mendî şarê Tirkîye bî. Cok ra îlanê OHALî kuçeyan de bimbarek kenê. Nê aktivîte û nûmayişê ke bi organîzasyonê AKP virazîyenê bi raştîyan ra eleqeyê xo çinyo. Çike dinya de jew cayî de (sebebê ci çi beno wa bibo) derbe û rewşê awarte bi kêfweşî nînê pêşwazî kerden. Nê pêrokînî netîceyê operasyonê têgihîn yê AKP de benê. Çike AKP bi derbeya sivîl cewab dana hewldayenê derbeya lejkerî.
Hewldayena derbe yê 15ê Tîrmehî kê viraşt, kamî organî kerd, kê desteg da, gişta kê mîyan de esta hona zelal nêbi.La çiyo ke nika zelal o, derbeya sivîl yê AKP dewre de ya. Ganî herkes dûştê na taloke de aya bo. Na derbe de birnayişê serre, îdam, lînç, îşkence û kiştiş ra pîya her çî rewa yo. Nayî ra derbeya esasî neyra tepya destpa kena. Eke çormeyê mûxalefetê demokratîk quwetê xo nêkerê jû û vernîya ci nêgîrê rojê tarî û bi gonîn şaran pawenê.