SEMRA TURAN / MA / DÊRSIM
Hetêk ra xebatê weçînayîşî yê Dêrsimî dewam kenî û heto bîn de xebatê teknîkî zî resayî nuqtaya peyêne. Pêro pîya 64 hezar 290 weçînitoxî Dêrsim de estî û do 493 sindoqî bironyî. 46 sindoqî do bêrî kiriştiş. HDPyî heta nika pêro pîya 190 kesî sey heyetê sindoqan wezîfedar kerdî.
Seba ewleyîya sindoqan avûkatî do serê sindoqan de bivinderî. 20ê Hezîrane de HDP do perwerde bido wezîfedaranê xo yê sindoqan. Endamê Komîsyonê Weçînayîşî yê Bajarî yê HDPyî Huseyîn Dagdevîrenî qisey kerd û melumatê muhîmî dayî. Dagdevîrenî va ‘seba kirişîyayîşê sindoqan ma nika ra wesayîtî kîra kerdî’ û wina domna: “Ma do heme weçînitoxan biresnî sindoqan. Weçînayîşî sindoqan de yenî qezençkerdiş. Xebatan de şar eleqeyêko gird nîşanê ma dano. Ma do her di parlamenteran zî bivejî. Wa weçînitoxî tena ray nêdî, wayîrê sindoqan zî bivejyî.”
Dagdevîrenî peynîya qiseykerdişê xo de va ‘seba weçînayîşêko adil ganî herkes rasteyan de bibo’ û wina qedêna: “Zîhnîyeto ke esto, ancax bi no hawa şono. Dêrsim seba 24ê Hezîrane amade yo û seba hesabperskerdişî rojan paweno.”