Dersim de bi germbîyayîşê hewayî, kesê ke karê heywankarîye kenî, dest bi hevringê purtê mêşna û bizanê xo kerdî. Kesê ke bi heywanan debara xo kenî, seba ke heywanê înan bi hawayo rehet zozanan de bigêrî, qelew bibî û vera nêweşîyan de bihêz bibî, purtê heywananê xo qesnenî. Purtê ke yenî qesnayene zî yenî rotene û tira ameyeyêk yeno qezenç kerdene. Melek Aytekîna ke dewa Kocatepe ya Pîlemurîye ya Dêrsimî de debara xo bi heywanan kena, dest bi hevringkerdişê bize û mêşnayanê xo kerdî. Aytekîne daye zanayene ke aye bi karê heywankarîye debara xo kena. Aytekîne bi xo zî bi serran o karê hevringî kena û rojêk de tewr tay 10 bize û mêşna hevring kena. Aytekîne dîyar kerde ke karê hevringî zaf zehmetin o û wina va: “Ma purto ke qesnenî, şiwenî û dima ra tira nivîne û balîşnayan virazenî.”  MA/DÊRSIM