02Dêrsim de kulturê Kalo Gaxanî dewam keno. Pîrozkerdişê Kalo Gaxanî raşteyê Seyîd Rizayî de dest pêkerd. Badê ûrf û adetanê kehenan loqme ame vilakerdiş û derheqê Kalo Gaxanî de malumat ame dayîş. No kulturo ke ewro Dêrsim de yeno ciwînayene roj bi roje beno vîndî.
Pîrozkerdişê Kalo Gaxanî bi beşdarbîyayîşê hezaran kesan û bi def û zurneyan raşteyê Seyîd Riza yê Dêrsimî de ame pîrozkerdiş. Pîrozkerdiş pêroyê sûkê bajarî de virazîya û şar bi govendan roşanê Kalo Gaxanî pîroz kerd. Organîzasyonê kulturî de Pîr Hasan Sonmez û Pîr Hasan Kilavuzî loqme vila kerdî. Pîrozkerdişê roşanê Kalo Gaxanî de şama herême Zîrfetî ame paykerdiş û badê vilakerdişê şame organîzasyon peynî bî.
Vilakerdişê loqmeyan de hunermend Metin Kahramanî qisey kerd û va: “Takvîmê îbadetî yê 3 aşman no proses de dest pêkeno. Pîr û murşîtî dest bi gêrayîşê talîban kenî. No kultur girê dîyeno Gaxan Hizir û Xizir Hawtemalî. 21ê adare de yeno temamkerdiş. Kaye de torbecî û veyvek estî. venven na dinya temsîl kena. Aşma Gaxanî de kesê ke keyeyê xo ra dûrîyî yenî zîyaretê keye û merdimanê xo. Dim ara Xizir û Hawtemalî yenî. No roşanê kulturî yeno mehneya piştîdayîşî.”
Ganî ma kulturê xo bimusnî ciwan û domananê xo
Aktîvîstê xoza Haydar Çetînkayayî zî înan ard ziwan ser: “No kultur tarîx ra nata Dêrsim de esto. tewr zêde dewan de virazîyeno. La nika bajar de zay nîno pîrozkerdiş. Seba ke roşanê kulturî Gaxanî nêro vîrîkerdiş, ma tewrê embazanê xo ameyî tîya. Ganî ma kulturê xo bimusnî ciwan û domananê xo. Gaxanî yeno mehneya serra newe.”
DÊRSIM