Roja verî walitîyê Dersim rayîra Pîlemûrîye trafikî rê girot. Heto bîn ra 13 kesê ke roja verî amey binçimkerden ra 9ê ci serbest veradîyayî. Heto bîn ra çalekîyo ke 23ê Temmûz de dûştê noqteya polîsan virazîya YPS û YPS-JIN girot ser xo.
Girotişê rayîran
Rayîra Pîlemûrîye roja verî heta seatanê perroz bi fermanê walitîyê sûk amê giroten. Noqteya qontrolî ke zerreyê sûk de nezdîyê Cemxane de ronîya zî raştê nêrazîbîyenê welatijan ame. Welatijê ke rîwalê qontrolî 2 seatî amey vindernayen na dirûmî rê hêrsê xo damûsnay.
Heto bîn ra vizêr seatanê şanî de zî bi îdiayê mavêna Navendê Dersim û Qereqolê Halvorî de operasyon esto, şîyayişê wesayîtan hetê Pilûr amey manîkerden. Noqteyê geyrayiş ke ver Qereqolê Halvorî de ronîya wesayîtan rayîra Geyîksûyû ra riştî Dersim. Naca de zî badê çend seatan rayirî trafikî rê rakerdî.
No mavên de çalekîyo ke 23ê Temmûz de dûştê noqteya qontrolî yê polîsan virazîya YPS û YPS-JIN girot ser xo. No çalakî, çalekîyekê sifteyin o ke YPS/YPS-JIN Dersim de viraştî yo.
9 kesî serbest veradîyayî
Kişta bîn ra 13 kesê ke roja verî netîceyê sereştişê keyeyan de amey binçimgiroten ra 9ê ci serbest veradîyayî. Azayê MP yê HDP Alî Ekber Kaya, Mûxabîra ETHA Ezgî Ozer ra pîya 13 kesî bi derbkerden amey binçimkerden. Quwetanê dewlet wextê sereştişî de çêberê keyeyan şikitî, çîyê keye kerdî têtewr û pey xo de şopê gonî ternay. Mûxabîr Ozer ra pîya 9 kesî serbest veradîyayî. 4 kesê ke hona binçiman de yê yeno pawiten ke sewqê mahkeme bibê.
DÎHA/DERSIM