Dersîm de 10 serrî yo BDP serdest a. Tabî na serdestiye de bara tayê rêxistinanê bînan kî esta. Quweta xo çi bena bibo, nî partiyan zî poşt dê BDP. Bi na hal belediya CHP dest ra amê guretene. Qomê Dersîm saltanatê CHP rizna û hen omid keme ke na weçînîtîs de zî onca teqetê demokrasî kunê ser. Hata nika hen zî oseno.

Dersîm de onca jû îtîfaq ame virastene. Na îtîfaq de lewê BDP de HDP, EMEP, ESP û PARTÎZAN ca cenê. Xeylê rêxistinê sîvîl zî poşt danê na îtîfaq. Vayoke serokê CHP Kemal Kiliçdaroglu weçîntîsê 2011 de vay da, o zî nêmend. Binê rayveriya Kemal Kiliçdaroglu de bî zelal ke,  CHP xo newe nêkena, raya Ataturk, Îsmet Înonu, Celal Bayar, Bulent Ecevît û Denîz Baykal ra devam kena. CHP tarîxê xo de xeyle reye kewte gonya kurdan û aleviyan.
CHP 1938 de can û royê dersîmizan guret. Hata ewro zî CHP Tertelê Dersîm qebul nêkerdo. Nî rozanê peyenan de zî CHP Cemaatê Fetullah Gulen de kewta tekîliye. Zoneme ke Fetullah Gulen qomê Dersîm ra hasnêkeno, nefret keno. Na derheq de kasetê Fetullah Gulen vejiyayî werte. Fetullah Gulen jû kasetê xo de vano ‘Aleviyê Dersîm mara niyê, nusayri yê...’ Yeno zonayene ke Cemaatê Fetullah Gulen Suriye de verva aleviyan poşt dano îslamîstanê terorîst. Yanî eke destebera xo bêro, ma dersîmizan rê kî hen keno. Nî rozan de zî verva AKP poşt dano CHP, cirê kasetan rusneno, Kiliçdaroglu zî nînan keno vila. No piyagurenayîsê CHP û Cemaatê Fetullah Gulen newe niyo. Waxtêde Ecevît vat bî ‘sima na mordemekî ra çi wazenê, ça verva Fetullah dawa kenê ra, no tirkitiye rê xizmete keno.’ Heto bîn ra zî îdeolojiyê CHP çik o, bi misnayena namzetan marê reyna bî zelal. Weçînîtîsê 2011 de wastena Demîrel ser, CHP xeyle siyasetvanê partiyanê rastî kerdî parlamenter. CHP nika zî MHPyiz kerdî namzet. CHP na wa, her tim niya biye. Hora binê rayveriya Kemal Kiliçdaroglu de CHP de hem morê  parlamenteranê alevî, hem zî teşkîlatanê CHP de morê sermiyananê alevî bî kemî. Qomê Dersîm gune na raye şilpaxa henene CHP rodo ke, reyna xoser meyero û Dersîm caverdo.
Gorê mi, gurenayîsê îtîfaqî gune rew dest cikerdenê û pêro teqetê çepî biguretenê zerrê xo. Zoneme, jû îtîfaq ronayene honde rehet niya, çike tayê rêxistinê qickekî xo zaf girs vînenê û gorê raştiye hereket nêkenê. La nî rêxistinî teyna Dersîm de estê, yanî endemîk yê. Cayanê bînan de ne quweta xo esta ne vengê xo. Na zî raştiya Dersîm ya. Qiz, pîl çi beno bibo gune pêro teqetê çepî têlewe de bê. Verva sîsteme û verva partiyanê dewlete gune piya bigureyê.
Onca zî îtîfaqoke amo ronayene, besekeno jê hata nika weçînîtîs de serkuyo. Dersîm de mesele, mesela maqam û kirşî niya. Dersîm de mesele verva partiyanê sîsteme jê CHP û AKP tever estena û sîstema şoreşgere ronayen a.