Federasyonê Alewî Bektaşî ABF û Komeleyê Kiltûr yê Pîr Sûltan Abdal PSAKD’î serva protestokerdinê qetlîam û ablûqeya dewleta Tirk veriya çend rojan Enqera de destpa nûmayişê grevê veyşanî kerdî. Badê Enqera, Stenbol, Mugla û Antalya de kî alewiyan destpa nûmayiş kerdî. Vizêr kî Dersim û Mersîn veng da nûmayiş û destpa grev kerdî.
Yê ke bêveng manenê ma ra niyê
Şubeyê PSKAD yê Dersim de damûstayin ame dayen. Parlamenterê HDP yê Dersim Alîcan Onlu, Hemserokê DBP yê Dersim Nûrhayat Altûn û Mehmet Alî Bul kî paşt day. Serokê komeley Alî Gerçek’î qesey kerd û ebi vatena: “Yê ke çiyê vîniyen ra vanê mi nêdî, yê ke raştiyê ke zanê la nêanê zon ma ra niyê” aşkere kerd ke, îye de verra qetlîaman bêveng nîmanê.
Qezaya Mersîn Tarsûs de zî bi desan kes komeleya PSKAD de are bî û destpa grevê veyşanî kerdhi. Serokê Şûbe Cûma Erçe’yî aşkere kerd ke serva ke tifingî bêveng bibê, merdisî vinderê, domanî nîmirê destpa nûmayis kerdiyê. Erçe’yî va, wazenê sûkanê ma açarnê zey Kerbela. Serdestê ke Îmam Huseyîn û alwozanê ci teysan ternay û qetilkerd, nika kî Kurdistan de eynî çî kenê. Şarê ma mehkûmê goç, veysanî û sefalet kenê.
DÎHA/DERSIM/MERSÎN
FEDA: Çokê xo nêdame ro
Heta bîn ra, Federasyonê Alewiyê Demokratîk FEDA kî derheqê zilm û zorvajiya dewleta Tirk de damûstayîn da. Damûstayîn da vajiya ke, ma şaro ke welatê ci biyo çar lete û vilayê pêrokîn dinya biyê yê. Kamiya ma înkar biya, ma jenosîdî diye.
FEDA aşkere kerd ke, ma verra koletî azadî, verra kolonyalîzm rayverînê xoser wazeme. Damûstayîn de hayr anciya qiseyê dîktator Erdogan’î yê “ya îteat bikerê, ya kî bimirê” ser û niya vajiya: “Ma hometê Alewiyê Rêya Heq ê, kamiya ma Kurdî ya. Ma ebi Semah hetê heqîqet ray şime. Zey Qizilbaşê Kurd û Tirmen, ma verniya kesî de çok nêda ro, nêdame ro. Zanime ke, teslîmiyet beno xiyanet, xoverdayiş beno serkewtiş.
NAVENDÊ XEBERAN