Akademîsyen Nurîye Gulmen û mamosta Semîh Ozakçayo ke wezîfeyê xo ra ameybî îxraçkerdiş, seba ke karê xo tepîya bigîrî, Cadeyê Yukselî yê Anqara de çalakîya vêşanî daybî destpêkerdiş. Çalakîya Gulmene û Ozakçayî kewte roja xo ya 62. Akademîsyen Candan Badem û Ahmet Kerîm Gultekînî ke Unîversîteya Munzurî ra ameybî îxraçkerdiş zî seba ke piştî bidî çalakîya Gulmene û Ozakçayî seba rojêk grevê vêşanî dayî destpêkerdiş. Badem û Gultekînî dovîzê ke ser de ‘Wa seba Gulmene û Ozakçayê ke 62 rojî yo xover danî rê Dêrsim ra silam bo”, ‘KHK û îxraçbîyayîşan rê Nê’ nusîyayênê akerdî û karê xo waştî. Badem û Gultekînî bi çalakîya xo waştî ke wa KHKyî betal bibî û OHAL bêro wedarnayîş.
Ma xover danî
Gultekînî babete ser o va ‘çalakîya Ozakça û Gulmene nîşandayîşê îrade ya’ û wina domna: “Merdimê ke hetgirê azadî, demokrasî, edalet, laîkî û seyyewbînanî de yî vera OHAL û KHKyan de xover danî û beyraqa xoverdayîşî berz kenî. Na çîyêka zaf bimana û bierj a. Ma hetê înan de yî û wayîrê têkoşînê înan vejîyenî.”
Gun 75 rojî yo grev de yo
Heto bîn ra Pîyê Murat Gunî ke netîceyê bombekerdişê Newala Çetî de bi 11 DHKCyîyan reyde merdbî Kemal Gun zî seba ke cenazeya lajê xo bigîro çalakîya grevê vêşanî dabî destpêkerdiş. Çalakî roja 75. de dewam kena.
Gunî va, “Ez do heta peynî xover bida. Heta ke ez parçeyêk kateyê lajê xo nêgira, ez tîya ra nêşona cayêk. Heta ke çalakîya mi netîce gêna, ez do çalakîya xo bidomna. Netîceyê ci de ez bimira zî ez nêşona cayêk. Ez bi îrade û îftîxarê xo vindena.
DERSIM