Operasyono ke hetê Quwetanê Sûrîyeya Demokratîke (HSD) ra verbi Reqa, bi nameyê ‘Şero Gird’ amebî dest pêkerdiş, dewam keno.
Operasyon roja xo ya 4. de domîyeno û şerwanê HSDyî hetê rojhelat û rojawanî ra kewtî bajar û pêrodayîşê şîddetinî dest pêkerdî. Şerwanê ke hetê rojhelatî ra kewtî bajar mîyan, taxa El Meşlebî keye bi keye DAIŞî ra pak kenî. Şerwanê ke sifteyîne kewtî bajarî mîyan derheqê operasyonî de qisey kerdî û hîsanê xo ardî ziwan. Şerwanan ra Suwar Serêkanîyêyî va ‘ma grûba sifteyîna ke kewtî bajarî mîyan î û heta nika 500 metre aver şîyî’ û wina va: “Ma ewil bi pakkerdişê mayînan dest bi karî kerd. Her ke ma aver şîyî, çeteyî remayênê. Nika ziqaq bi ziqaq, cade bi cade pêrodayîşê sing û sing dewam kenî.”
Ver bi merkezî şonî
Şerwanan ra Egîd Agirî zî vist vîrî ke operasyonê Xezebê Firatî ke 7 aşmî yo dewam keno, nika resayo hedefê xo yo esasî û wina dewam kerd: “Ma taxe de 2 ziqaqan çeteyan ra pak kerd. Mabênê ma û çeteyan de 400-500 metre esto. Ma gam bi game ver bi merkezî şonî. Heta nika ti qeybê ma nêbî. Ma bi moralêko pîl operasyonanê xo domnenî. Seba ma tîya de vîstê tarîxî yenî cuyayîş. Merdim nêşêno muhîmîya na vîste şinase bikero. Ma her yew sey Derwêşê Evdîyî kewtî bajarî mîyan û aver şonî. Merdim mîyanê nê hîsan de bi hawayo bihêz eşkeno şer bikero.”
Azadî nezdî ya
Şerwanan ra Mehmet Seît Dervîş zî dîyar kerd ke o zaf biheyecan o û vatişanê xo wina qedêna: “Çimkî ma seba ke vernîya averşîyayîşê girdî yê merdimîye biakerî, şonî. Ma demêko derg o ke amadekarîya nê rojan kenî. Cok ra ma haya muhîmîya her gama xo de yî. Ma nê erdan zulmo tewr girdî ra xelisnenî. Nika ma ameyî paytextê çeteyan. Wa şarê ma bizano ke ma do demêko nizdî de azadîya Reqa îlan bikerî.”
NAZIM DAŞTAN / DÎHABER / REQA