Nûmayîşê Grevê Vêşanî ke seba wedarnayîşê tecrîda ser Rayverê Şarê Kurd Abdullah Ocalan’î, peynîardişê binlingkerdişê heqan ame destpa kerdiş, bi pêrokîn pêtînya xo rameno.Hemserokê HDP Selahattîn Demîrtaş, Hemseroka DBP Sebahat Tûncel û Parlementerê HDP Abdullah Zeydan zî vera binlingkerdişê heqan ewro destpa grevê veyşanî kenê. Parlementera HDP Besîme Konca zî no 7 rojîyo grevê veyşanî de ya.
Girotxaneyê Şakranî de grev roja 45. de yo. Yê Sîncanî de roja 36., Edîrne de roja 34., Menemen de roja 25., Wan de roja 24., yê Kurkçuler a Edene roja 17., û Hêlwan de roja 15. de yo. Goreyê zanayîşan tepişteyan xêlê kîlo û proteîn kerdo vinî.
TTB ra vengê pêdîyayîşî
Endama Konseya Navendî yê Yewitîya Tabîban ê Tirk (TTB) Selma Gungor ke derheqê babed de qisey kerd, waşt ke selahîyetdarî waştenanê tepişteyan qebûl bikerê. Gungor da zonayen ke rewşê nûmayîşkaran merhaleyekê krîtîk de yo û waşt ke selahîyetdarî desince bi tepişteyan ra pêdîyayîşî virazê.
Ganî çareserîyeke bîro peyda kerdiş
Gungor, ard ziwan ke ganî tepişteyê ke nûmayîş de yê rê vîtamîna B1 bîro dayen û va, ‘Eke vîtamîna B1 nîro dayen, beno ke tepişteyan de nêweşîya "Sendroma Wernicke-Korsakoff" bivejyo. No zî beno sebebê vinîkerdişê aqilî.
Selma Gungor aşkere kerd ke ganî tepiştey bi rêk û pêk bîrê muayenekerden û wina va: “Ganî selahîyetdarî desinde bi tepişteyan ra pêdîyayîş virazê hu çareserîyeke peyda bikerê. Ma omid kenê ke waştenê înan bîrê qebûlkerdiş û peynîya çalakî bîro dayîş.
Şakran de tepişteyan rê îşkence
Rixmo ke Grevê Vêşanî vera îşkence û binlingkerdişê heqan destpa kerd zî, heto bîn ra ver tepişteyan îşkence û zorvajî ramenê. Goreyê îdîayan Girotxaneyê Alîaga yê Şakranî, Tîpê T de, tepiştey seatanê şew de qoxişan ra ameyê vetiş, bi hawayo viran cayekê serdin de ameyê vindernayîş.
Mubarek Nas ke bi birayê xo Kamûran Nas’î ra bi raya telefonî qisey kerd ard ziwan ke binlingkerdişê heqan her ke şinê behê berz. Pêdîyayîşê telefonî de tepişte Nas’î enê zonayişan dayo: “Binlingkerdişê heqan resyayê merhaleya îşkenceyê fizîkî. Awa ma yena birnayîş. Gardîyanî erzenê qoxişanê ma ser û heqaretan kenê. Pêdîyayîşî yenê birnayîş. Roşanê peynî de zî gardîyanî erzenê qoxişan ser, tepişteyan kenê viran û cayekê serdin de viradanê.
Çorum de ‘Ekîbê îşkence’
Derheqê îxlalê heqanê tepişteyan de jû xeber zî girotxaneyê Çorûm ra amê. Girotxaneyê Çorûm de zî 7 tepişteyanê bi nameyê Îdrîs Ozdemîr, Abdullah Guven, Eyup Kiliç, Saîd Demîr, Omer Sîpek, Abdullah Gundogdû û Agît Kaysi, 10ê Adare de destpa Grevê Vêşanî yê bêdem û bêdorveger kerdî. La nûmayîşkarê ke grev de yê raştê îşkenceyê ‘Ekîbê pêrodayîşî’ ke girotxane de ronîyayo ameyê û giran bîyê dirbetin.
Tepişteyan ra Îdrîs Ozdemîr ke bi maya xo Hedîye Ozdemîrî ra telefonî reyde qisey kerd nê zonayîşan da: “22ê Adare de gardîyanî kewtî qoxişan mîyan û waştî ke herkes werzo ser payan. Dima ra waştî ke ma ala tirk bigîrê destê xo, ser payan de vinderê û vajê ‘Çi rindo ke ez tirk a’.” Gardîyanan tepişteyan ra vato ke ganî şima qebûl bikerê ke şima ‘tetorîstî yê’. Dayik Ozdemîr veng da her kesî ke vera kerdenanê bêînsanî bikewê hereket.
KCD: Waştenan qebûl bikerê
Kongreyê Civaka Demokratîk (KCD) zî derheqê Grevê Veyşanî yê tepişteyanê sîyasî de îzahatekê nuştekî da û aşkere kerd ke waştenê tepişteyan, waştenê yê pêrokîn şarî yê. KCD vist vîrî ke rewşê tepişteyan merhaleyekê talokeyîn de yo û waşt ke desinde waştenê tepişteyan bîrê qebûlkerdîş.
Heto bîn ra Hemserokê HDP Selahattîn Demîrtaş, Hemseroka DBP Sebahat Tûncel û Parlementerê HDP yê Çolemêrg Abdullah Zeydan zî vera binlingkerdişê heqan ewro destpa grevê veyşanî kenê. Parlementera HDP yê Sêrtî Besîme Konca zî no 7 rojîyo grevê veyşanî de ya.
NAVENDÊ XEBERAN