Jû aşmiyo ke zerriya Kurdan Kobanê de erzena. Barbarê ke çormeyê Kobanê girotiyê ebi tank û topan erzenê ser. Pêrokîn dinya zey ke jew filîmî temaşe keno weyneno. Tayînan vatî tenya jû roj damiş nêbeno, tayînan vatî badê çend rojan gineno war. Xora dewleta tirk ebi omidê gird û vatişê ‘Kobanê emşo kewno’ kewtişê ci pawena. DAIŞ ra piya, dewleta AKP û tayn çormeyan kewtişê Kobanê û peyniyê kewtişê ci de her çî plan kerdbî. Ebi kewtişê sûk ra piya dewleta Tirk do heremê tampon roniyaybî û bi piyakariya DAIŞ ra Kurdan û şaranê herem qetilkerdibiyayî û hegemonyeya xo vilakerdibiyayî. Veriya çend aşmî wexto ke Erdoğan serokwezîrê Tirkiye bi, aşkere kerd bi ke îyê dê plananê xo yê B û C vistrê dewre. Nê planê ke Erdoğan’î behs kerd nika hona rind yenê fehmkerdiş. Dewleta Tirk a ke seba binkewtiş û îmhakerdişê Kurdan bi serrano her ray û raybazî kar ard la sernêkewt, nika zî barbaranê DAIŞ rişt ser Kurdan. Fina-reyna Erdoğan’î bi xo qebûl kerd ke înan bi celadanê DAIŞ ra bazareyê siyasî kerdo. Xo ra hewceyê delîlan zî çinyo, hikûmeta AKP a ke Kurdan xo rê zey dişmen û DAIŞ zî zey dost vînena, roja sifte ra heta na het her hetî ra desteg da çeteyan û hona zî dana. Samîmiyetê AKP û yê çeteyan hendayî rindo ke çeteyî zerreyê tirkiye de xo tenzîm kenê, komelî û sazgehî akenê, tirkiye zey raya ravêrdinê qetlîaman şixûlnenê. Keso ke nînan peynêhesiya nêmend. Û pêrokîn dinya zano ke, emelê paştdayinê tirkiye qirkerdişê Kurdan o. Tirkiye ra piya xeylê dewlet û çormeyê ke sîstema konfederal ê Kurdan xo rê zey tehdît dî, DAIŞ tenzîm kerd û seba vilakerdişê sîstemê demokratîk ê Kantonan rişt rojawa ser.

DAÎŞ jew plan û projeyê qûwetanê kapîtalîstan o, ke seba verîgirotişê ronayinê paradigmayê demokratîk, ekolojîk û azadîwaşt ê Rayverê Şarê Kurd Abdullah Öcalan ame tenzîmkerdiş. Nay ra lej-herbo ke Kobanê de yeno dayen, lejê mavêna netew-dewletê ke goreyê menfatanê sîstemê kapîtalîst roniyay û mavêna qûwetanê azadîwaşt ê şaran de rameno. Sîstemê kapîtalîst o ke zey bîrê korr civakan weno nêşa rojhelatêmiyanî de îdeolojiyê xo bi ca bikero û goreyê xo dîzayn bido, cinawirê zey DAIŞ peyda kerd û rişt ser şaran.
La pêrokîn plan û projeyê DAIŞ, AKP û qûwetanê bînî Kobanê ra peyser açariyay, veng-tol vejyay. No îtifaqê qilerîn-leymin her çî plan û tenzîm kerdî la tenya jew çî hesab nêkerdî, o zî îrade û xoverdayişê şarî yo. Înan pawitî ke zey Musil Kobanê zî do jû roj de teslîm bibo.Kobanê seba herkesî bi zey îmtihan, riyê raşt ê herkesî vet werte. Meseleyê Kurd de plan, proje û niyetê AKP deşifre bi.  Nika balê-hayrê pêrokîn dinya açarniyayê Rojawayê Kurdistan û Kobanê ser. Herkes verra xoverdayişê Kobanê şaş û şoq biyo.
Kobanê pêrokîn istanikê qehremaney pey xo de virada û startê mîladê serbestî yê şaran da. Çi ke keyney, lajî, mayî-piyî, kal û pîrî ganê xo seba hard, welatê xo kerdê zey mertal û nêviradanê neyar-dişmenê ci ravêrê. Kobanê de tenya jû destan nê, ebi qehremaney û ebi goniya Kurdan dîrok newe de ra yena niwîsnayen.