Şengal! Bi ziwanê şengalijan Şingal! Waro dirbetin, waro qedîm ê Êzidiyan. Warê yê ke tayênan ê kerdê ‘Yê bîn’. Warê yê ke 73 terteleyan ra vîyartê. No reqam çiqas bîyo normal. Tawo ke yêno vatene muyê kesî nêwurzenê ra! 

Êzidî herhal tawo ke leşkerê ereban ê talanker bi nameyê îslamê de kewenê Kurdistanî ra nat bîyê ‘Yê bîn’. Qanûnê yo ke dest çek gêno bîkîşe doman û cinîyan xo rê bibe o taw ra dest pêkerdo heta roja ma ya ewro rameno. DAÎŞo ke 03.08.2014 bi destegê dewleta tirk, Barzanî û pîşta hêzanê mîyandewletî eşt ser Şengalijan zî eynî kultur berdewam kerd. Ez vana kultur çunke tu qanûn hende demderg nêşkîno xo berdewam bikero. No kulturê desthilatdaran o. Bi hezaran camêrdê Êzidîyê ke rastîye de camêrdê Êzidîya yê ke çek dest de nêmendbî ê rew ra ameybî bê çek kerdene, kîştî bi hezaran cinî û domanî sey xanîmet bi xo ra berdî. Berdî bazaranê qefçilan de rotî. Bazaranê şermê qirnê 21. de. Ez vana bi hezeran çûnke tu reqamêde zelal çîn o. Goreyê mi reqamê ke yênê vatene rast nîyê. Heta nika kesî derbarê nê terteleyî de tu cigêrayîşê rast û durist nêkerdê. Desthilatdarî hîna kayanê xo yê qefçilan domnenê. 

Tarîxê Şengalijan ê nêzdî de darbeya tewr girse Êzidî rejîmê baas ra wenê. Heta ey wextî Şengalijî koyê Şengalî der ê û şîkînê vera êrîşanê dişmenanê xo de xo ver ro bidê. Şîkînê xo biseveknê. Rejîmê baas bi dara zorê Êzidîyan koyê Şengalî ra veceno ci ra vanê “mucemma” yan de kom keno. Bi na tore bi seyan dewan û mezreyan ano têlewe keno çend dewanê girs. Seba ke bişîkîyo Êzidîyan binê kontrola xo de bigêro nîya keno. Êzidîyan keno leşkerê xo. Awe û daranê koyê Şengalî birneno. Koyê Şengalî keno rûp û repal. Eke hukmê Sedam Huseynî rijîyeno pey ra Berzanî projeya Sedamî keno temam. Guman çîn o ke fermanê 73. de û pey ra Êzidî derbeya tewr girse Berzanî ra wenê. Barzanî zaf bi bîryar û israr wazeno Êzidîyan bikero binê kontrolê xo. Peyê fermana 2014 ra çîyê ke bi dizdî, bi dek û dolaban kerdênê 03.03.2017 ra êdî eşkera keno. 3ê Tebaxa 2014 û 3ê Adare 2017 de bi çeteyanê ser erdî, êrîşê Şengalî kerd, 25ê Nîsane 2017 de bi çeteyanê asmênî êrîşê Şengalî kerd û hîna êrîş keno/ê. Bi destûrê dewletanê sey Amerîka, Rusya ûsn Berzanî û Erdogan êrîşê Şengalî kenê. 

Konseptê Tebaxa 2014 yê Erdoxan, Berzanî û hêzanê desthilatdar, hetê Tewgera Azadîye û gerîlayanê ci veng/tol ame veten.  Konseptê  Adar û Nîsana 2017 de êdî şerwananê Êzidîyan bi xo veng vet. Şerwananê YBŞ û YJŞ  cewabê nê êrîşan da. Konsept û plangerîya Berzanî û Erdoxanî ke ê pîşta xo dewletanê girsan ra gênê nêşî serî. Çûnke êdî Êzidîyê Şengalê Êzidîyê verê terteleyê Tebaxa 2014 nîye. Êdî belengazê bin destê Berzanî nîyê. Şengalijî êdî xo ra nêvanê belengaz. Şengalijan êdî xo rêxistin kerdo. Ya tewr muhîme kî royê azadîyê yo ke PKK bi fikr û felsefeya Rêber Ocalan Şengal de nayo ro, êdî jîl dano. Êdî kokê xo ruşnayê xorînîya hardî. Kes êdî hinî rehet nêşkîno nê damaran biqilayno ra. 

Erdogan bi xeyalê bîyena Fatîh Sultan Mehmetî hareket keno, la êdî o dem û dewran vêrd ra. Êdî no şar destûr nêdano ti bibê sultan. Ti koşk û sereyanê bi hezar beran kî virazê ti nêbenê sultan. Yê ke vanê “Wa PKK Şengal ra vecîyo“,  xebara şima çîn a Êzidî bîyê PKK ma şima Êzidîyan Şengal ra vecêrê! Şima nêşkînê Êzidîyan Şengal ra vecêrê çûnke PKK hîna nêmerda hîna ser lingan a. 

Tîya de ez wazena venga mordemîye biderî. Kesê ke hîna xo ra vanê ma mordemê, vanê ma hemverê neheqîyênê, hemverê deshilatdaran ê, vanê ma demokrat ê, sosyalîst ê, o taw wayîrê Şengalî wayîrê Êzidîyan vecîyê! Bêrê ma pêro pîya nê gonîweran ra vacîme; destanê xo yê gonînan Şengalî ser ra biancê.