Hewldayenê derbeya 17ê Temûze ra dima OHAL ame îlankerdiş û bi Qerarnameyê Hukmê Qanûnî Kurdan ra pîya çormeyê demokratîke rastê hêrişê hukmatî ameyî. Nê hêrişan ra çapemenîya muxalîf zî para xo girewt. Bi taybetî nê di aşmanê peyênan de DÎHA, JINHA, ÎMC, JIYAN TV, ZAROK TV û Azadiya Welat zî tede xeylê televîzyon, radyo, ajans û rojnameyî bi nê qerarnameyanê OHALî padîyay.

Nuştox, rojnameger û hunermendê ke Kurdistan û Ewropa de cuyenî, bi vilawekêk zext û zordarîyê ke çapemenîye ser o yenî meşnayîş, bi taybetî zî padîyayîşê Azadiya Welatî ser reaksîyonê xo nîşan dayî. Nuştox, rojnameger û hunermendan bi nê vilaweke heman demî de bi nameyê “Destanê xo menê medyaya kurdan ra“ kampanyayê zî dayî destpêkerdiş. Kampanya rê eleqe her ke şona bena hîra û kesê ke wazenî îmzeya xo erzenî nê kampanya. 

Verba zulmkaran de doş biderîme doş

Metnê vilaweka ke hetê rojnameger, nuştox û hunermendan ra ameya hedrekerdiş wina ya: 

“Ma nuştox û hunermendê kirmancî nê şîyayîşî û na rewşa medyaya kurdan qet rind nêvînenîme. Zulmkaran roştî ma ser o kerda tarîye. No sebeb ra kî gerek ma êdî pêro pîya verba nê zulmê zulmkaran de doş biderîme doş û bi vengê xo, bi rengê xo û bi qewetê xo mucadele bikerîme. 

Seke yeno zanayene, Azadîya Welat zî 29. teşrîna verêne 2016 de bi tayê rojnameyan û bi tayê kovaran û binê nameyê OHAL de serheb kok ra kerdî kîp. Yanî, rojnameyo ke bi rojane û seranser bi kurdkî weşanayêne, hetê dewleta tirke ra ame kîp kerdene. 

Bi serran o ke Tirkîya de medyaya kurdan ser o zulm û zordarîye berdewam kerdê û hetanî ke kerdî kîp. Ewro kî şarê ma vengûvaj gireetene ra mahrûm mendo. Rojnameyê ma, televîzyonê ma, kovarê ma û ajansê xeberan ameyê kîp kerdene. Ewro têkilîya ma bi dinya birîyaya. No zulm o! 

Kes nêşîkîno vengê ma bibirno

Azadiya Welat vengê bêvengan rê bîbî veng û rengê mazlûman re kî bîbî reng. Kes nêşîkîno vengê ma bibirno û heqa kesî kî çin a ke vengê ma bibirno. Na zorbazîyênî ya, nêheqîyênî ya, bêhuqûq û bêedaletênî ya. Ma na nêheqîyênî nêwazenîme, qebûl nêkenîme. 

Ma ewro heqanê însanetîye ra mahrûm mendîme. Darbe ser o darbe bena? Ewro tern û huşk têmîyan de veşeno. Xeylê însanê ma yê bêsuc û bêgunayî ameyê pêgirewtene ya kî binê nezaretî der ê. Na nêheqîyênî ya û ma na nêheqîyênî nêwazenîme. Vengê ma ameyo birnayene û dinya ma rê kerda zîndan. Heqa kesî çin a ke vengê ma bibirno, ma vengê xo peyser wazenîme. Ma çareserîye û aştîye wazenîme û no zulmî rê vanîme endî bes o!

Xeylê kesî vilaweke îmze kerdî

Heta nika kesê sey Haydar Diljen, Wusênê Gestemerde, Lerzan Jandil, Azad Ararat, Şengul Pak, Xezale, Soner Soyer, Aydin Bîngol, Alî Aydin Çîçek, Pinar Yildiz, Îbrahîm Beyaz, Denîz Gunduz, Mehmet Akbaş, Gule Mayera, Bakî Gul, Erdal Er, Rozerîn Kahraman, Emrah Kelekçier, M. Dogan, Sevgî Yurtsever, Mehmet Seyîtalîoglû, Alî Şeker, Firat Guneş zî tede xeylê hunermend, rojnameger û nuştoxî bi îmzekerdişê vilaweke beşdarê kampanya bîyî. Kampanya her ke şona bena hîra.

Azadiya Welat sey akademî yo

 Mîyanê nînan ra rojnameyê Azadiya Welat bi lehçeyanê kurdî (kirmanckî û kurmanckî) weşan kerdêne. Rojnameyê Azadiya Welatî serra 92 de bi nameyê ‘Welat‘ dest pêkerd û serra 94 de zî zextan ver nameyê xo kerd ‘Welatê Me‘ weşanê xo domna. Seba ke ame padayîş, serra 96 de bi nameyê ‘Azadiya Welat‘ hawayo heftane dest bi rojnameyêk neweyî kerd û Rojnameyê Azadiya Welat serra 2006 de bi hawayo rojane dest pê weşanê xo kerdbî. Azadiya Welat sey akademîyêk her tim rojnamegeran resna û xeta xo ya raştîye ra tavîz nêda. Azadiya Welat û xebatkarê ci demê weşanê xo de xeylê reyan raştê hêriş, tewqîfkerdiş û mergî ame. Xoverdayîşê Cizîr û Nisêbîn de xebatkarê rojnameyî hetê hêzê dewlete ra ameyî qetilkerdiş. Tewr peynî 29ê teşrîna verêne de rojname yewna rey ame padayîş.  


 NAVENDÊ XEBERAN