Heya nika hemverê viraştişê nê bendawî qet nerazîbîyayîşê nêmojneya yo. Çira? Axayî bendawî wazenê. Eke bendaw bivirazyo erdê axayan benê awî.
Dewlete wazena
Dewa Boxazî qezaya Amede Erxenî ra 5 km dûrî ya. Rojawanê Erxenî de manena. 2 rayîran ra merdim eşkeno şêro dewe. Rayîrê yewine (jûyine) rayîrê Xarpête de, hetê fabrîqaya çîmentoyî ya, ya diyine zî rayîrê Çêrmûge ser ra ya. Tede 4 arêyî bî û amnan-zimistan xebityayê. Her roj bi seyan kesan arişê xo ardê arêyanê Boxazî. Wexto ke ceyran ame Erxenî, dewa Boxazî qiymetê xo vinî kerd. Erxenî de arêyê ke bi ceyranî xebityenê ameyî viraştiş.
Der û dormeyê dewe de koyî estê. Cêrê dewe de baxçeyê dewe estê. Mabenê nê bexçan ra çeme (la) vêrena. Na çeme tarîx de zaf medenîyetê ko aver ardo meydan. Çayonu yan zî Hîlar. Çayonu heme kitabanê tarîxî de ca gêna.
Koyan miyan ra Çemê Boxazî hêdî hêdî herikyena. Wexto ke merdim şino Boxaz, se ke şêro dewê da Karadenîzî. Merdim oksîjenêko hendek weş geno ke, nêwazeno na dewe ra şêro. Heta çend serrî verê coy îhtîyacê Erxenî yê zerzewat û fêkîye, zaferî Boxaz ra ameyê tedarikkerdiş. Deşta erxenî, Helbeto, Hîlare, Kalxane û deşta Macîran bi awka Boxazî ra ameyê awdayiş.
Wazenê dewe de bendaw bivirazî
DSÎ nika erdanê dewijan miyan ra rayêre virazeno, la heqê erdan zaf kêm dano. Dewijî nika poşman biyê û neçar mendê. Hem erdî û zergûniya înan dest ra şina, hem zî dewlete heqê erdanê înan zaf kemî dana.Tiya de zaf çiyê ke balê merdimî anceno; dewijî xora nezanî yê. Labelê ti kesî hemverê nê rewşî çîyek nêkenê. Bexçeyê Hevselî, Parka Gezî, ODTÛ û Bendawê Farqînî de zaf kesî, partî, kesê ekolojîstî, sazî û komeleyî vecyabî meydanan nêrazîbîyayîşê xo mojnabî. Labelê qetlîyamê Boxazî de her kes bêveng o.