Dêrsimo ke tede polîtîkayê vengkerdişê dewan û veşnayîşê hêgayan yenî ramitiş de seba ke zirar bidîyo tebîetî sîlehê kîmyasalî yenî xebetnayîş, daristanî yenî veşnayîş û tertul veradîyenî daristanan mîyan.
Heto bîn ra çend rojî verê nêweşîya şarbonî ke nêweşîyêka enfeksîyonî ya, qezaya Pulurî ya Dêrsimî de ameye dîyayîş. Na nêweşîya ke hetê baytaran ra dewanê Çakmakli û Kedekî de ameye teşhîskerdiş, rojanê peyênan de bîye sebebê mergê 7 heywanan. Babete ser o dewijî qisey kerdî.
Dewa Kedekî ra Hanîfe Bale va ‘nêweşîya şarbonî yabanî ra bi heywanan ameya’ û wina dewam kerde: “Xora 3 mangayê mi estbîy, yewe merde. Sewbîna debara mi çin a. Ez mecbûr a ke kênaya xo ya ke durî de ya ra hetkarîye biwaza. Sewbîna hawa ez nêşêna debara xo bikera.”
Tedbîr nêame girewtiş
Ozgul Keskîne zî va ‘mangayê dewe her roje hetê kesêkê ra yenî çerênayîş’ û wina domnaye: “Mangayanê birayê mi ra 2 hebî merdî. Baytarî zaf erey ameyî dewe. Ganî verê cû tedbîrî biameyênê girewtiş. Labelê emser mangayî nêameyî aşîkerdiş. Baytarê ke Mudurîya Weşîye ra ame, dîyar kerd ke înan emser mangayan aşî nêkerdî, labelê yê ke biwazo şêno bi pereyê xo mangayanê bîşêro aşî bikero. Yanî heta ke mangayî nêweş nêkewî, dewlete nîna dewe.”
Waştişname dayî
Dewa Kedekî ra Kader Şene zî va ‘ez bi rotişê şit û sewbîna çîyan debara xo kena’ û wina va: “Na nêweşî ver dewijî etirîyenî. Yê ke mangayê înan merdî, waştişname dayî, labelê ez bawer nêkena ke waştişnameyan ra netîceyêk bêro girewtiş.”
Kumru Yuksela ke 3 mangayanê aye ra yewe merde zî wina va: “Heta nika penîrê ma zaf bî û mi dayêne her kesî. Labelê nika ez mecbûr a ke kênaya xo ra hetkarîye biwaza. Nika 2 mangayê mi mendî, eke ê zî bimirî ma do se bikerî?”
ŞÛJIN/DERSIM