Qezaya Şemzînanî ya Colemêrgî de 9ê teşrîna verêne de vera Qereqolê Dûrî de hêrişêko bombeyîn qewimîyabî. Hêrişî ra dima leşkeran ser rayîrî de xendek kinitbî û cok ra rayîrê dewê Dêman, Melevîya, Tîsê û Hêlankêyî şîyayîş û ameyîşî rê ameybî padayîş.
Nê semedî ra dewijî dewan de mehsur mendî û seba şîyayîş û ameyîşî zî mecbûr î ke 12 kîlometre rayîr bi payan şêrî. Dewijî nêweşê xo heta rayîrê Şemzînan û Gever benî û ewja ra zî bi îmkananê xo benî nêweşxane. 150 wendekarî seba ke rayîr padaye yî, nêeşkenî şêrî dibistane.
Vewre varaye la rayirî nêabî
Dewa Melevîya ra Azad Geylanîyî babete ser o wina va: “Ma xeylê reyan îdarekaran reyde pêvînayîş kerd la netîceyêk nêgirewt. Ma qeymeqamîye reyde pêvînayîş kerd û ma ra vatî ‘Eke vewre varo, do rayîrî abî.’ Vewre varaye, la hîna zî rayîrî nêabî. Xebatkarê Bejahî tena heta xendekan rayîr akenî û tira dima leşkerî destûr nêdanî. Ma perîşan bîyî. Ma nêweşanê xo bi texteyan kirişenî û benî nêweşxane.”
Kazim Geylanîyî zî wina va: “Ma her roje çîyê giranan piştîya xo ser de benî dewe û ma nêeşkenî problemê weşî û werê heywananê xo çareser bikerî. Ma veng danî îdarekaran ke wa rayîrê ma biakerî.”
AZAD ATALAY / DÎHABER / COLEMÊRG