Hîre, çor rozi ra avê rojnamê fermî de jû qerar ame vila kerdene. Seweta feteleyena madenan hûkûmat şîrketanê xorê raya de neweyî keno ra.
Cayê ke madenê yenê sayekerdene sûke je Colemerg, Dêrsim, Sêrt, Mêrdîn, Wan, Şirnex, Batman, Amed, Xarpet, Erzirom estî.
Nika no yeno ci mana; simarê raye osena, welatê xo, hardê xo caverderê şerê. Hûkûmatê AKP dewlemendîya Mezepotamya serra xorê rant qezenç kena. Ekonomiye hardê Kurdistan serra AKPyizî peranê xo jedenenê.
Lewe naye de hedefê dewlete a wo ke şarê kurdî bêhard raverderê. Hîn jedena rehet polîtîka asîmîlasyon raye ra bene.
Ma kê Dêrsim de niyada vîneme AKP ci fîkîr de ra. Asmanê pêyenan de Dêrsim û Elewiyan sero honde qeseykerdî. Ci ra çik vejiya; talan, asîmîlasyon, înkar.
Dêrsim de her cem-awe sero jû projeya HES û bendawe yena virastene. Mûnzûr, Mercan, Pîlemûrîye, Peri, Taxar... Hete ra kî bi siyanura zern yenê sayekerdene, hete ra kî vetena madenan esta. Payiza wertene de vejiya werteke bendawe û proja HES yê Pembelîk qacaxa. Eskera, verê çiman de honde çiyo de girs çitur qacax yeno virastene.
Mehkeme de qerar ame guretene ke bendawe Pembelîk de gurenayisi berê vindarnayene. Hama kam mehkeme, hûqûq naskeno. Peyê şîrketan de dewleta AKP esta.
Şîrketê Lîmakî bi xo taşeronê dewlet o û heta nika Dêrsim de tebîet û dorûver bi hîrê barajan xeripna. Şîrketê Lîmak bi qûweta ke AKP ra ceno, vireniya bendawa Pembelîk guret. Vengê awa Perî birna. Jiyara Gola Xizir, mezel û dewan binê awe de verda.
Pirdê xoverdayiş serra endî gencî nê, awe qilerîne sona.
Avê bendawê Uzunçayir dime ra Pembelîk, avê jiyara Gola Çetû nika jiyara Gola Xizir... AKP kirmancanê elewiyan roz bi roz bi na raya itiqate ci ra dur kena.
Jû qom ke hard û asmenê xo ra dur mend, kamiya xo ra ke dur kuno. AKP bi polîtîkayanê qilerînan a hem asîmîlasyon serrê şarê kurdî de dana ramitene, tarîx kena xirave, hem kî ekonomiyê şarê kurdî xorê cenê.
Peyê hefta virene konferansê ‘Hard, awe û enerjiyê xo komun bikerême’ virajiya. Teyna bi qeseykerdena nê, raşt hardê xorê wayir vejime. No karê ma pêrono.
Meral KUÇUK