Dûştê qetlîama Dîlok ke 20ê Tebaxî de qewimya nêrazîbîyenê Kurdistanijan ramenê. Zerre û teberê welatî de qetlîam bi nûmayişanê cîya amê protesto kerden. La hikûmeta AKP ya ke çeteyan wayirî kena û vernîya raya qetlîaman akena, destûrê nûmayişanê protestoyî û merasîmanê vîrarden nêdana. Çewlig de welatijan waşt pê şîyayişekê qetlîam rê nêrazîbîyenê xo damûsnê, la quwetanê hikûmet destûr nêday û bi ‘mudaxalekerdişî’ tehdît kerdî.
Çeteyanê DAIŞ 20ê Tebaxî de qezaya Dîlokî Şahînbey de vera veyveyekê êrişekê bi gonîn viraştî û meydanê veyve açarnay gola gonîn. Netîceyê êrişî de 54 kesan weşîya xo kerd vinî û 66 kesî zî bî dirbetin. Roja verî qurbanîyê qetlîam bi merasîmeke gird amey definkerden. Bi hezaran Kurdistanijî hêrsê xo yê vera hetkarînê AKP û DAIŞ ard ziwan û siloganê "Kiştox Erdogan" qîriyay. Keyeyanê qurbanîyan AKPyijê ke waştî şirê merasîmê cenaze merasîm ra qewirnay û aşkere kerdî ke ê pîyakaranê çeteyan merasîmê xo yê cenaze de nêwazenê.
Nûmayişê protestoyî ramenê
Verra qetlîam roja sifte ra na het xêlê cayanê de nûmayişê protestoyî virazîyay. Badê Îdir, Wan, Erzêrom, Edena, Îskenderûn, Semsûr, Amed û qezaya ci Erxanî, Mêrdîn, Sêr, Meletî, Îzmîr, Şirnex, Enqera, Riha, Colemerg û qezaya ci Gever, Gimgim şanê verî Çewlig de kî welatijan waşt qetlîam protesto bikerê.
Çewligijî bi rayverîna teşkîlatanê DBP û HDP yê sûk de seba protestokerdişê qetlîama Dîlok Pasajê Şarî de amey pêhet. Nûmayişa ke bi desan welatijî tewr bî de dowîzê “Qetlîama Dîlok bi nefret protesto kenê, kiştoxan silasneme” kerdî a. Welatijê ke waştî heta ver Quleyê Seat rayşirê hetê polîsan bi behaneyê tîvarî amey manîkerden. Polîsê ke destûr nêday şêligî bi vatişanê ‘eke şima rayşirê ma dê mudaxale bikerê’ tehdît kerdî. Ser nayî şêligî ver Pasajê Şarî de damûstayîn day.
Dewlet DAIŞ rê çimê xo girot
Hemseroka HDP yê sûk Zerrîn Berdîbek damûstayîn da û rîwalo ke polîsan destûr nêdayî protestokerdişê qetlîama Dîlok înan protesto kerd û nêrazîbîyen damûsna. Berdîbek vist vîrî ke DAIŞ bi serrano Dîlok de gam bi gam sûk xo rê kerd halûn û dewlet kî nayî rê çimê xo girot. Zerrîn Berdîbek hayr ant deklarasyonê KCK ser û raştameyişê teqînayiş pey deklarasyonî manîdar dî. Berdîbek aşkere kerd ke verîya hîrê rojan damûstayînê çapemenî yê şaredarê AKP û xêlê sazgehanê civaka sivîl ra destûr ame dayen û va, rîwalê protestokerdişê qetlîama Dîlok nûmayişê HDP û DBP rê destûr nêdayiş muameleyekê kêfî yo.
DÎHA/ÇEWLIG