Fermandaranê Qerargehê Merkezî yê Pawitişê Şarî ra Amed Malazgîrtî va ‘dewleta Tirkî êdî dewletbîyayîşî ra vejîyaya û bîya dewleta çeteyanê sey DAÎŞ û El-Nusra’ û wina dewam kerd: “Cok ra dewleta Tirkî reyde şer kerdene yeno manaya DAÎŞî reyde şer kerdene. Ganî no wina bêro zanayene.”

Fermandaranê Qerargehê Merkezî yê Pawitişê Şarî ra Amed Malazgîrtî derheqê têkoşînê Vakur û Rojhelatê Sûrîye de qisey kerd û bale ante xoverdayîşê tarîxî ser. Malazgîrtî va ‘dewleta Tirkî çend serrî verê planêk viraşto û game bi game ê planî erzena dewre’ û wina domna: “Raştîya xo de dewleta Tirkî tena HPG reyde şer nêkena, heme Kurdan hedef gêna. No hetê ma ra zelal o.”

Fermandar Malazgîrtî va ‘eke merdim dîqet bikero ewil hêrişê Vakurê Kurdîstanî kerd’ û wina dewam kerd: “Hewl da şarî bêveng bikero. Hemşaredaran ra heta parlamenteran heme tewqîf kerdî. Dewlete hewl da vajo ‘nê Kurdî nîyî, PKKyî yî’ û hêrişanê xo meşrû bikero. Wexto ke wina bi, bêvengî virazîyaye û îqtîdarê AKP û MHPyî zî nêyî ra cesaret girewt û cayanê sey Botan, Colemêrg û Serhedî de dest bi operasyonan kerd.”

Malazgîrtî qiseykerdişê xo de bale ante Herêma Biewle ke qala ci yena kerdene ser û wina va: “Nika qala herêmêka 32 kîlometre yena kerdene. Wazenî na herême ra hêzanê YPG û QSDyî vejî. Wazenî vajî ‘tîya de qezencê Kurdan estî, ma bi destê DAÎŞî waşt bigîrî labelê nêbi, ganî ti bidî ma, neke ma do Kurdan çin bikerî’. Ti kes nêvano çi karê to erdanê şarî de esto? Kurdî bi deshezaran serrî yo ke ewja de cuyenî. Nika tayê qezencê înan bîyî, dewleta Tirk wazena destê înan ra bigîro. Ma vanî dewleta Tirkî labelê Tirkî dewletbîyayîşî ra vejîyayî, êdî bîyî dewleta çeteyanê sey DAÎŞ û El-Nusra.”

No zelal o û herkes zano

Malazgîrtî va ‘DAÎŞ seba heme dinya tehluke yo’ û wina dewam kerd: “Na seba heme dinya babetêka muhîme ya. Seba Kurdan zî muhîm a. Ewro dewleta Tirkî reyde şer kerdene yeno manaya DAÎŞî reyde şer kerdene. Ganî no wina bêro zanayene. Çend rojî verê çeteyêkê DAÎŞî vejîyayo, vano ‘ma pawe yê ke dewleta Tirkî bêro ma bixelisno, eke bixelisno ma do cayêko mendî ra dewam bikerî’. Tayê dîmenanê bînan de zî aseno ke dewleta Tirkî çeteyan kirişena. No zelal o û herkes zano.”

 

Plan de Mûsil û Kerkûk zî estî

Malazgîrtî qala planê dewleta Tirkî kerde û wina va: “Vatişê dewleta Tirkî werte de yî. Çend rojî verê Wezîrê Pawitişî Hûlûsî Akarî xerîtayêk nîşan da û ewja de Mûsil û Kerkûk zî estbî. Hêrişî tena vera Rojawanî de nîyî. Amanco raştikên de Mûsil û Kerkûk zî estî. Şênî yan nêşênî, labelê amanco raştikên no yo. Goreyê mi dewleta Tirkî waşt şêro Mûsil, Kerkûk û Şengalî het ra labelê xoverdayîşê gerîlayan vernîya ci girewt, nika zî hêrişê Rojawanî keno. Wexto ke Kerkûk destê pêşmergeyan de bi ti problem çinêbî, labelê ewro her roje problemî vejîyenî. Herkes zano ke Kerkûk bajarêkê Kurdan o. Yanî herişê ke vera Rojawanî de yenî kerdene, destpêkê tayê hesabanê ke xeta Mûsil û Kerkûkî zî gênî mîyanê xo yî. Goreyê mi kurdîstanijî zî naye zanî. Cok ra heme Kurdî hêrişan ra dima weriştî payan ser.”

 

BEHDÎNAN