Dewlete mergê karkeran rê bêveng manena

Bextwaştoxê ke şero mîyanên yê Sûrîye ver ameyî Tirkîya û kesê ke bajaranê kurdan de problemanê ekonomîkan cuyenî, seba ke erazîyê zîretî de bixebetyî, bi hezaran kîlometre rayîr şonî û netîceyê qezayanê trafîkî de mirenî. 

Bitaybetî demanê peyênan de karkerê zîretî yê mewsîmîye ke Rojawanê Behrosîya û Rojhelatê Marmara de seba arêdayîşê findiqan şonî, raştê qezayanê trafîkî yenî û înan ra zafê ci mirenî. Tewr peynî qezaya Hendekî ya Sakarya de traktorêk qelibîya û 7 karkerî merdbîy û 9 kesî zî birîndar bîybî. 

Goreyê daneyanê Meclîsê Ewleyî û Weşîya Karî (ÎSÎG) 7 aşmê sifteyînî yê serra 2017î tewr kêmî 190 karkerê zîretî merdî. Meclîsî par zî aşkere kerdbî ke tewr kêmî 389 karkerê zîretî merdîy. 

Babete ser o Meclîsê ÎSÎGî ra Murat Çakirî qisey kerd.

Mecbûr manenî xebetîyenî

Çakirî va ‘wexto ke merdimî herême de zextê kulturî û ekonomîkî reyde têrî manenî, mecbûr manenî ke debara xo bikerî’ û wina dewam kerd: “Karkerê ke Sakarya de merdî, mergê înan qeder nêbî. Hesaban ra dewlete 2011 de perspektîfêk vetbî, labelê o perspektîf wina vindete yo. Serekwezîr Bînalî Yildirimî par vatbî ‘êdî do karkerê zîretî nêmirî, ma do tedbîran bigîrî’. Labelê aşma tebaxe de xeylê karkerî merdîy. Mergî zafane traktoran ver benî;  herçiqas ke traktoran de kiriştişê karkeran qedexe bibo, reyna zî yenî kiriştiş. Ganî dewlete resnayîş û miqatekerdişê karkeran bikera. Labelê dewlete mergê karkeran ver de bêveng manena.”