Ewro serrgêra Qetlîyamê Gumgumî ke 19ê Kanûna 1978î de pê ameybî ya. Qetlîyam ra nata 40 serrî derbaz bî. Hedîse hewteyêk dewam kerd û elewîbîyayîşê xo vera 111 kesî ameybî qetilkerdiş, zêdeyê 100 kesî birîdar bibî û 70 kargehî ameybî veşênayîş. Şahidê qetlîyamî ra nuştox Azîz Tunçî qala Qetlîyamê Gumgumî kerd.
Tunçî qiseykerdişê xo de qetlîyamo ke pê ame sey qirkerdişî bi name kerd û wina va: “Qetlîyam çimanê pêroyê dinya ver de pê ame. Labelê reyna zî hetkarî nêdayî ma. Gumgum de bi destê wezîfedarê siyasî, seba çinkerdişê muxalefetê komelî, pakîya etnîk û olî dayî dest pêkerdî û bi no hawa qetlîyam pê ardî.”
Tunçî dewamê qiseykerdişê xo de va: “Ganî merdiman tena nêewno hewteyê qetlîyamî. Dewlete hetê caardişê polîtîk ê sîstematîkî de wayîrê ceribnayîşan a. Seba qeradayîşê qetlîyamê amadekarî ame kerdiş. Hemverê elewîyanê kurdî de 1967î de qetlîyamê Elbistan, 1971î de Kirikkale û dima ra 1976î de Gumgum pê ame. Wexto ke qetlîyam pê ame kerdoxê paramîlîter yê faşîstî Taxa Yorukselîmî de qehweyê elewiyan dayî guleyan ver. Ewja de Gijik Dedeyê (Sabrî Ozkan) ame qetilkerdiş û dima ra pêrodayîş virazîya. 19 Kanûne de sotemenîyêk eştî Sînemaya Çîçekî û startê Qetlîyamê Gumgumî ame dayîş. 21ê Kanûne de zî di mamostayê şorişger wexto ke şîyêne keyeyê xo ameyî qetilkerdiş. Dewlete nêwazena qetlîyam bêro aşkerakerdiş.”
ÊLIH