Endamê Komîteya Merkezî ya PKKyî Bozan Tekînî derheqê prosesê sîyasî û rewşa zîndanan de qisey kerd û vînayîşê xo ard ziwan. 

 Endamê Komîteya Merkezî ya PKKyî Tekînî sebebê zextê ke zîndanan de yenî meşnayîş sey xetimîyayîş, têkşîyayîş û bêçaretîya dewleta tirk nîşan da û wina va: “Dagîrkerîya dewleta tirk vera gerîla û zîndanan de têk şîya. Gerîlayî Behrosîya ra heta Amanosan çalakîyanê girdan virazenî û vera dagîrkerîya dewleta tirkî de teslîm nêbenî. Dewleta tirk zî hêrişê hepsîyan kena; çimkî nika yê ke bêpawitiş û esîr hepsî yî. Dewleta tirk hewl dana hepsîyan bi cilanê tek tîpan esîr bigîra. Bi no hawa wazena komelî zî teslîm bigîra. Tarîx bi nimûneyanê winasîyan pirr o.” 

 

Sereronayîş teslîmbîyayîşê zaliman o

Tekînî dewamê qiseykerdişê xo de va ‘24ê Temmuza 2015î ra nata bi hawayo hîra hêrişê ma kenî’ û wina dewam kerd: “Vera nê sîyasetê dewleta tirkî de bi şexsê Çîyager, Mehmet Tunç, Sêvê û Zeryanan de xoverdayîş aver şî. Teşebusê derbe yê 15ê Temmuze ra dima bi hezaran merdimî hetê dewleta tirkî ra erzîyayî zîndanan. Vera nê faşîzmî de xoverdayîş suc nîyo. Xovernêdayîş, xoverdayîşî ra remayîş sucê merdimîye yo û ehlaqî nîyo. Çimkî dewlete wazena şarê ma bêîrade verada û çinî bikera.”


72 Saetê dewlete bîyî 34 serrî

Tekînî qiseykerdişê xo de qala hêrişê ke vera gerîla de bi teknîkêko gird yenî kerdiş zî kerd û wina va: “24ê Temmuza 2015î ra nata 3 serrî yo ke dewlete hewl dana gerîla biqedêna, la nêşena. Gerîla hîna bihêz bîyo. Seke yeno zanayîş Suleyman Soyluyî vatbî ‘ma do heta aşma nîsane nameyê PKKyî nêverdî’. Labelê eke merdim netîce ra biewnîyo, Behrosîya ra heta Amanosan çalakîyî ameyî viraştiş. Nika Soylu sey ke çîyêk nêvato, ê qiseykerdişê xo rê wayîr zî nêvejîyeno. Wexto ke Hemleya 15ê Tebaxe virazîyabî, Kenan Evrenî zî vatbî ‘ma do 72 saetan de biqedênî’ labelê 34 serrî yo ke nêqedîyayo. Nika seba ke nêşenî gerîla hêrişê şar û hepsîyan kenî. Seba ke hepsîyî bêpawitiş î, hêrişê hepsîyan kenî û wazenî şexsê hepsîyan de komelî teslîm bigîrî.”


Ganî sey Kemal Pîrî xover bidî

Tekînî peynîya qiseykerdişê xo de qala xoverdayîşî kerd û wina va: “Seba ke hêrişê ke vera ma de benî bi hawayo pêroyî benî, ganî ma zî vera faşîzmî de vindetişêko ortax nîşan bidî. Ganî ti kes nêvajo ‘ma ez cil xora bida se beno?’ Wexto ke cuye bêmana bîye û rûmet destê to ra şî, o wext çi qîmetê cuye maneno? Ganî hepsîyî nê hêrişan sey hêrişo topyekun bivînî û vera nê hêrişan de bi hawayo topyekun xover bidî. Ganî hîkayeya xoverdayîşî ya Kemal Pîrî nêra vîrîkerdiş. Ganî hepsîyî sey ke Kemal Pîrî vera Esat Oktayî de vindetbî, ê zî vera Esat Oktayo hemdem Tayyîp Erdoganî de bivinderî. Ma heme hepsîyan silam kenî û înan rê serkewtiş wazenî.” 


 ANF/BEHDÎNAN