Endamê Komîteya Caardişî ya PKKyî Duran Kalkanî derheqê çalakîyê gerîla yê Vakurê Kurdistanî, tecrîdo ke Rayberê Şarê Kurd Abdullah Ocalanî ser de yeno meşnayîş, tezkereyê ke meclîs ra ame derbazkerdiş, rewşa muxalefetî, referandûmo ke Başûrê Kurdistanî de ame viraştiş û sewbîna babetanê bînan de qisey kerd.
Endamê Komîteya Caardişî ya PKKyî Kalkanî va ‘vera xete, fikir û çalakîya gerîla de ti hêz nêşeno vindero’ û wina dewam kerd: “Artêşa tirkî ke artêşa 2. ya tewr gird ya NATO ya û no het de pesnê xo dana, demanê peyênan de vera çalakîyanê gerîlayan de têk şona. Şemzînan ra heta Dêrsimî çalakîyê gerîla her ke şono hîra benî. Wexto ke nê çalakîyê hemleyê ke HSD Reqqa û Dêrazor de erzenî reyde yenî têhet, tabloyêka girde vejîyena orte. Xeta gerîla çar parçeyanê Kurdistanî de aver şona û herême de hêzê faşîstî sey DAIŞ, El-Kaîde, AKP û MHPyî rijneno. Yê ke xo ra vano ez faşîst a, wa bivejîyo vera nê hêzî. No hêz do hemînan birijno.”
Kalkanî dewamê qiseykerdişê xo de va ‘Tayyîp Erdogan seba ke na dewlete payan ser de bigîro, çiqas tanq û teyarayî lazim bo, tepîya nêvindeno’ û wina dewam kerd: “No yeno manaya wehşetî. Erdogan dîyar keno ke o seba ke dewlete payan ser de bigîro, nînan keno. Yanî na dewlete nêşîna lingan ser de bivindera. Çimkî lingê aye şikîyayî û şîyaye ya. Erdogan seba ke vernîya rijîyayîşî bigîro, heme hêzan ver lebîyeno. Wazenî wina bikerî ke PKK fek xoverdayîş ra verabido. Tayê xusûsê ke yenî ma rê, estî.”
Mîtîngê HDPyî muhîm î
Kalkanî qiseykerdişê xo de qala çalakî û mîtîngê HDPyî zî kerd û wina va: “Prosesêko winasî de vejîyayîşê teber yê şarî, vera faşîzm û qirkerdişê AKP û MHPyî de vindetişê şarî, vindetişêko fedakar, cesur û egîd o. Şar bitaybetî nêyî seba azadîya Rayber Apoyî keno. Na çarçewa de mîtîngê HDPyî yê Stenbol, Wan, Amed û Edene zaf muhîm û tarîxî yî. Çimkî şar vera hêzo ke împaratorîya tersî awan kerdo de vejîyeno. Vera zext û tedayanê winasîyan de xoverdayîşê girdî yenî nîşandayîş. Nê çalakîyî hetê HDP, HDK, ESP û Partîya Şorişgere ra yenî kerdiş. Raştîya xo de ODP û Tevgerê Hezîrane yê Yewbîyaye zî eşkenî çalakîyanê winasîyan bikerî. Vera faşîzmî de xover dayîş û yewîya xo awan kerdiş, muhîm o.”
Kalkanî bale ante azadîya Rayberê Şarê Kurdî Abdullah Ocalanî ser û wina va: “Seba azadîya Rayberîye xebetîyayîş, seba bîyayîşê merdimî, nêbo nêbeno yo. Waştişê azadîya Rayber Apoyî waştişêko ke tena seba partî û şarê kurd yeno waştiş nîyo. Raştîya xo de no seba merdimî û demokratîkbîyayîşî waştişêk o. Waştişê azadîya Rayber Apoyî nîşan dano ke kam demokrat o û kam vera faşîzmî de têkoşîn dano. Ma vindetiş û çalakîyê ke nînî na xete ser, sey demokratîke nêşinasnenî.”
Weçînayîşê Komunî yê Rojawanî
Kalkanî peynîya qiseykerdişê xo de wina va: “Kesê ke vanî ‘ma bi serran tena sereyê xo bîyî îqtîdar’ û meclîsî padayî wa weçînayîşo ke Şorişê Rojawanî de virazîyeno ra biewnî. Vakurê Sûrîye de bingeyê sîstemêko newe erzîyeno. Ewja de sîstemo ke bingeyê ci de weçînayîş esto, erzîyeno. Îdarekarî bi weçînayîş yenî ser kar. Ewro demokrasîya ke yena qebulkerdiş, demokrasîya ke bingeyê ci de şar esto ya. Rayber Apo nêyî sey demokrasîya îdareyê herême şinase kerd û nêyî ra va xoserîya demokratîke.”
Yewîya Neteweyî sabote kerdî
Kalkanî da zanayîş ke Kongreya Neteweyî ya Kurdistanî kom bîyêne û Rojhelato Mîyanên de demokrasîya kurdan awan bîyêne û wina va: “Labelê vernîya ci ame girewtiş û sabote kerdî. Hêzê ke vernîya ci girewtî, referandûmî eştî orte. Na îdîa nîya. Ez eşkena nameyê tayê kesan zî bida. Ti eleqeyê ci PDK reyde çin o. Ti rolê PDKyî nêyî de çin o. Xoserî û azadîye demokrasî reyde eleqeder î. Nê heqî nînî munaqeşekerdiş. Labelê nê hêzî wazenî averşîyayîşo ke bi têkoşînê azadî û demokrasî vejîyayo orte, bigîrî bin tesîrê referandûmî û mîyanê sîstemî de bica bikerî. Sey ke yeno zanayîş no referandûm seba statuyî nê, seba bazarî yeno kerdiş. No referandûm seba ke PDK hetê sîyasî de xo kom bikero û newe ra weçînayîş qezenç bikero, yeno viraştiş. Meclîs nêxebetîyena, demokrasî çin a. Kongreya Neteweyî çin a. Parçeyê Kurdistanî mîyan de nîyî. Siba hêzê bînî eşkenî bivejyî û reyna înkar û îmha bidî ferzkerdiş. Xora Îran, Iraq û Tirkîya bîyî yewe û tehdîd kerdî.”
ANF/BRUKSEL