AZAD ARARAT


Referandûm/rapirsî/giştpirsî yew metod o. Dewletî ge-ge bikar anê. Weçînayîş bi rêk û pêk yeno kerdene. Eke rewşe îstîsnayî nêbo, weçînayîş wextê xo de beno. Labelê referandum winî nîyo. Eke ganî bo, dewlete yan zî desthilatî metodê referandûm fînenê dewre. Ge-ge menfîetê desthilatî û şarî reseno yewbînî. Eke wina bo problem çin o. Labelê xeylê reyî dewletî yan zî desthilatî seba ke amacanê xo meşrû bimojnê metodê referandûmî fînenê dewre. Bi no tewir amacanê xo ca kenê. Vêşî zî dîktatorî metodê referandûmî bikar anê. Saya referandûmî plananê xo yê nimite kenê meşrû. Referandûm seke yew heqo meşrû û demokratîk  aseno, la pratîk de rastîye winî nîya. 

Mavajî, hetanî nika Tirkîya de 1961, 1982, 1987, 1988, 2007, 2010, 2017 de hewt rey referandûm ameyo kerdene. Peyê nê referandûman ra Tirkîya bîya sîstemêko holêr? Nê Tirkîya nêbîya sîstemêko holêr. Binê dîktatorîya ewro ya Tirkîya de nê referandûmî estê. Çira? Seba ke desthilatî nîyetê xo yê xirab bi propaganda menfîetê netewî ser o awan kenê. Peyê perde de amacê esasî estê ke xizmetê desthilatî kenê. Verê perde de, verê çimanê her kesî de, bi hetkarîya medya, qala netew, welat ûsb. yeno kerdene. Bi no tewir referandûman de desthilatî serkewte benê, la şar vindî keno. No babetî de Tirkîya nimûneyêka tewr rind a.


Çira PDK nînê masayê yewîye?

Başûrê Kurdistanî de zî referandûm rojev de yo. No referandûm seba veng vetena xebatanê Kongreya Neteweyî ameyo aver vistene. Tevgera Azadîye vana Kongreya Neteweyî nêbo nêbeno. Mesût Barzanî zî referandûm fîneno rojeve. Ê ke nînê masayê Kongreya Neteweyî kam ê? Sere de PDK û Mesud Barzanî nînê masayê munaqeşekerdişê Kongreya Neteweyî ser. Çend serrî Mesud Barzanî qalê xoserîya Kurdistanî kerd. Peyra nişka va, wextê xoserîya Kurdistanî nêameyo. Êdî na propaganda bê feyde bî. Her kesî fam kerd ke nîyetê Mesut Barzanî de xoserîya Kurdistan çin a, la o xorê bikar ano.    Na finî zî Barzanî û PDK qala referandûmî kenê. Xoserî ra fek veradayîş û referandûmî rojevkerdiş xora peyser gam eştiş o. Labelê nêşenê referandûmî zî virazê. Do encex kurdan rê berê belayanê newîyan akerê. Çira?


Bi „xoserîye“ emrê xo derg kenê

*  Serra 1991 ra hetanî nika Başûrê Kurdistanî bi mefûmê eşîrete îdare kenê. 

*  Mesud Barzanî bi xo serekêko meşrû nîyo.

* Parlamento gruba Mesud Barzanî pada. 

* Hêzê pêşmerge nêbî hêzê pawitişê neteweyî, sey hêzê partîye mendî. 

* Dîplomasî nêbî yê Başûrî, bî yê partiyan û PDK zî dîplomasîya partiya xo kena. Nê xalan merdim şeno zêde zî bikero la hewce nêkeno. 

Ê yê ke halê ci wina bo xora nêşenê dewlete bironê û îdare bikerê. La şenê fikrê awankerdişê yew dewleta kurdî vera şar bikar bîyarê. Xora o yo ke bi serran o beno zî no yo. Bi vatenanê xoserîya Kurdistan û referandûm PDK û keyeyê Barzanîyan temenê xo derg kenê. 


Yew kaya mîyanneteweyî ya

Eke Başûrê Kurdistanî problemanê zîhnî, sîstemî çareser bikero, o wext referandûm bêro kerdene, do wateyê xo estbo. Labelê yew dewleta kurdî sey Îsraîl, Ermenîstan û Yunanîstan tena Başûrê Kurdistanî de bêro ronayene, sey Ermenî û Yunanan, Kurdî zî do bêrê teng kerdiş û parçeyanê bînan yê Kurdistanî de kurdî do nêmanê. Heta seserr verê zî Kurdistan baxçeyê şaran bî. Ermenî, cihu, aşûrî xeylê şarî est bî, la nînan nika zaf kêmî mendê. Tirkîya de zî badê ronayîşê dewleta Yunan ra, yunanî Tirkîya ra amey qewirnayîş. Eke tena Başûrê Kurdistan de yew dewleta kurdî bêro ronayene, hem Başûr de hem zî pêroyê Kurdistanî de kurdî do bêrê kêmî kerdene. Başûr de zî Mûsil û Şingalî visnenê, Kurdistanî ra ciya kenê. Naye yew kaya mîyanneteweyî ya. Eke kurdî aya nêbê, ameyox de xeylê komkiştenan zî vînenê. Labelê têkoşînê azadîye aver kewto û plananê winasî ra destûr nêdano. 


Dagîrkeran het de ca megîrê!

Rojevkerdişê yew dewleta kurdî a qij ra vêşî, ganî ma vajî, dewletêka wina ra hewcedarîya kurdan çin a. Dewr, dewrê modernîteya demokratîk o. Awankerdişê herêmanê demokratîk hîna rast û goreyê çaxê ma yo. Nayî ra ganî kurdî lezkanî Kongreya Neteweyî virazê. Kongre de yew sîstema kurdî seba heme parçeyanê Kurdistan bêro ronayene. Kurdî problemanê xo, xo mîyan de çareser bikerê. Ganî parçeyê Kurdistanî piştî bidê yewbînî û dagîrkeran het de ca nêgîrê. Eke wina bî Başûrê Kurdistanî de zî problemî do bêrê çareser kerdene. 


Şarî mijûl mekerê!

Dewlete û sînor ronayîş peynîya xo ardiş o. Sîstema Konfederal ronayîş û bêwata verdayîşa sînoran, cuyayîşa newî yo. Naye ra nimûne zî têkoşînê Vakur û Rojawanê Kurdistanî yo. Cok ra, wa kes bi rojevkerdişê referandûmî şarê ma mijûl nêkero û nêxapîno. Wa her kes seba Netewa Demokratîk xebat bikero. Çunke serkewtişê kurdan û şaranê bînan na têkoşînî de yo.