Serva weçînayişê îdareyê newî yê Tirkiya û Kurdistan mordnayişê peynî destpa kerd. Goreyê zonayişan HDP tebere welat de mavêna 250-280 hezar rey girota. Nika qorê welato. HDP rojanê peynî de Stenbol, Mêrdîn, Erzêrum, Dersim û vizêr zî Amed de mitîngê heybetîn û coş viraşt. Nê mitîngan de zî ayseno ke HDP him sûkanê Tirkiye him zî sûkanê Kurdistan de raştê eleqeyê gird yena.
Serva-qandê na eleqeya gird AKP û Erdoğan zaf tengî û zehmetî ancenê. Nayî ra talîmatê hêrişkerdişê HDP danê. Çewlig û Erzirûm de qontra, polîs û cendirmeyanê AKP goreyê talimata ke girotî eştî HDP’yijan ser. Çewlig de gurekarê HDP Hamdullah Öğe bi 30 guleyan hetê qontrayanê dewlet ame qetilkerdin. Dewlet fina-reyna 6 domonî-qeçikî bê pî virada. Erzirûm de zî faşîstî û polîsê dewlet kuçeyan de vejyay seyda Kurdan. Nê çormeyê ke rijnayişê goniya Kurdan ra hes kenê jû wesayîta ke şoföre ci zî miyan de bi day ver adir. Waştî ganî ganî no welatijî biveşnê. Hendayî aqilê xo werdiyê. Herzewbîn zerreyê ci de kal, qij, ceniyan ra piya 18 kesan kerdî dirbetin. Hêrişê verra HDP tenya bi nê sûkan ra sînor nêmendî. Rojanê peynî de Amed, Mêrdîn, Wan de zî qûwetê dewlet ser kar de bî. Heta nika verra HDP nezdiyê 200 hêrişî viraziyay. Hêrişê bombeyîn yê Edena û Mersîn kesî xo vîra nêkerdî. Herzewbîn rojanê peynî de operasyonê binçimkerdin û girotiş zî ramenê. AKP verikîn muşahîdanê HDP ra piya bi desan kesan girot binçiman.
Verra HDP hendayî hêrîşî çima viraziyenê?
Jû; çi ke serkewtişê HDP, binkewtişê AKP îşaret keno. AKP paweno ke HDP binê bendawê weçînayişî de bimano û homarê parlamenteranê xo vêşî bikero. E ke homarê parlamenteranê AKP vêşî bibê xeyalê Erdoğan’î yê derheqê ‘sîstema serokîn’ yenê ca. Erdoğan serva-qandê ke bibo padîşah herkesî feda keno. Çend kes bimirê zî xema Erdoğan niyo.
Didi; Erdoğan’o ke dî HDP bena partiya pêrokîn şaranê Tirkiye û Kurdistan kewt panîkî. Çi ke înan nêpawitî ke HDP do hendayî vila bibo û xo bido qebûlkerdiş.
Hîrê; Meclîsê Tirkiya nika antî-demokratîk o. E ke HDP dekewo meclîsî miyan, do prensîbanê demokrasî û hiqûq îşaret bikero.
Çihar; Makeqanûna Tirkiye wextê derbeya faşîstîn de ameya hadre kerdin, nayî ra makeqanûnê da faşîstîn a. HDP do waştena newede ra viraştişê makeqanûnê da demokratîk biyaro ziwan.
Panc; HDP do heqê perwerdeyê bi ziwanê may, heqê îbadet serva pêrokîn hometî, heqê ceniyan, heqê gurekaran û heqê pêrokîn şaran biyaro ziwan.
Şeş… hewt.. heşt, des, se… hezar... Serva vurnayişê meclîsî û siyaseta Tirkiya hezar sedemî estê.
Nayî ra AKP 7’ê hezîran ra zaf tersena. AKP kesê ke ci rê rey nêdanê zey ‘xayinê welat’, ‘terorîstî’ biname kena. Projeyê ‘sîstema serokîn’ yê Erdoğan’î eslê xo de derbeya. E ke Erdoğan bibo padîşax do verra Şaran zilm bikero.
Weçînayişê 7’ê Hezîran tenya weçînayişê parlamenteri niyê, vêşiyê ci yê. Nê weçînayişî dê qederê pêrokîn şaran zelal bikerê. Cok ra wa kes bi zûrriyanê AKP nîro xapînayiş û Erdoğan’î nêkero serok.
Haydî ma şirê ser sandiqan û dewrê AKP biqedînê, dewrê azadiyan, demokrasiyan, dewrê şaran, dewrê HDP bidê destpakerdiş.