Qezaya Gêlî yê Amedî de visîyayîşê qapaxêkê Awbenda Dîcle ra dima berzbîyayîşê sewîyeya awe ya Royê Dîcle hewna zî dewam kena. Dereyê Dîcle yo ke tede ge-ge berzîya awe resena 6 metreyî, qismêkê Baxçeyê Hewselî yê ke Lîsteya Kultur û Mîrasî yê Dinya yê UNESCOyî de yê zî binê awe de mend. Ekolojîste Guner Yanliçe qisey kerd û daye zanayene ke muxadeleyê ke Royê Dîcle ser o yenê kerdene bîyî sebebê nê netîceyan.
Ekolojîste Guner Yanliçe qiseykerdişê xo de wina va: “Eke şima vajê ma serdestê xoza yê, her ca de Santralê Hîdroelektrîkî (HES) awan bikerê, awbendan awan bikerê netîce de şima do raştê na menzera bêrê. Dîcle 2 hezarî serrî yo herekêna, la hewna menzerayêka winayêne nêdîye. Ma perçeyêkê xoza yê, serdestê ci nêyê. Ganî ma aye dir aheng de bê. Çîyo ke ma tayê pê rehet benê çinêbîyayîşê merdeyan o. La halê qapaxanê bînan ra ma bifikar ê. Qapaxê bînî çiqa saxlem ê ma nêzanê. Baxçeyanê Hewselî zirarêko pîl dî. Nika seba yew qapaxî sewîye mabênê 4 – 6 metreyî de bî berz, eke di qapaxî bîyêne do mabênê 8 – 10 de bîyêne berz.”
Bi awbendan cayê dereyî vurîya
Yanliça ke îfade kerde do herekîyayîşê awe hewna hîrê rojî zî dewam bikero û heta nika panc qezayî û 11 mehlayî nê ra mutesîr bîyê dewamê qiseykerdişê xo de nê va: “Bi virazîyayîşê awbendan cayê dereyî vurîya. Rîyê nînan ra bi desan tewirê heywanan ê doran ra bîyî vîndî. Eslê xo de no qewimîyayîş do çîyêkê zaf muhîmî biyaro meydan. Heta menganê hamnanî mumkun nêyo ke ê qapaxan tamîr bikerê, na yewe ra do ro bi xuşe xuşe bi herekîyo. Viraştişê awbendan sey marîfet zanê. 2014 de Sêrte de bê ke hîşyarî bêro kerdene vernîya awbendî amîbî akerdebe, bi desan kesî awe de mendîbî û 6 kesan cuya xo vîndî kerdebî. Hedîse ra dima mucadeleyê huqûqîyî ra ti netîceyêk nêamebi girewtene.”
AMED