DÎHA 14 serran de bi şiklekê radîkal mudaxaleyî xeta şaş yê çapemenîya Tirkîye kerd. Na ajansa ke quwetê xo raştîyan ra û civakî ra girot, heta ewro raştê xeylê zext û manîkerdişanê hukmeta AKP amê. DÎHA bî vengê kesê ke vengê înan nîno aşnawitiş û mîkrofonê xo dergê her kesî kerd. DÎHA, her tim bî hedefê îxtîdarî.
DÎHA bado ke amê ronayen, hêrişa sifteyin 2004 de bi behaneyê Zîrveyê NATO Stenbol de virazîya raştê sereştişî amê. Bi desan gurekarê DÎHA amey binçimgirewten.La roja pey qewimyayişan bi wendox û aboneyanê xo ra bare kerd. DÎHA, aşkere kerd ke iyê dê bi nê hêrişan nîrê bêvengkerdiş. Heta nika bi desan gurekarê DÎHA amey binçimgirewtiş, raştê tehdîd û zextan ameyê, bîyê dirbetin, buroyê înan ameyê girotiş. Rexmê nînan DÎHA weşana xo dewam kerd û bî vengê raştîyan.
Bî vengê cenîyan
DÎHA qewimyayişê Gezî, cînayeta Ozgecan Aslan û yê pêro cenîyan pêrokîn dinya rê da aşnawitiş. Dawaya N.Ç ke raştê tecawizê 26 polîs, lejker û memûranê dewletê amê û zey “Dawaya Şermî” yena zonayiş pêrokîn dinya rê da aşnawitiş. DÎHA bî vengê gurekaranê Soma, gurekaranê înşaat yê Ermenek.
Komkiştena Robostî ke 28ê Kanûna 2011 de qewimya û teyareyanê Tirk Roboskî de 28 kesan qetilkerd DÎHA bi resîm û dîmenan xeber bare kerd.
Qora sifte DÎHA xebera tacîz û tecawizê dûştê domanê Girotxaneyê Pozanti yê Edena 2012 de ard rojdem û vila kerd. Na xeber ra dima Girotxaneyê Pozanti ame girotiş. Colemerg de dîmenê domanê 14 serrî Cuneyt Ertuş ke hetê polîsan raştê hêriş ame û qolê ci ame şikitiş DÎHA vila kerd. Dîmen û xeberê serhildana Amed yê 28ê Adara 2006î û kiştişê domanê 6 serrî Enes Ata DÎHA vila kerd.
Cemîle, Taybet Cizîr û...
Pêrokîn qewimyayişê ke raştê manîpulasyonî amey, çim û goşî cira amey girotiş, komkiştenê sivîlan DÎHA deşîfre kerd. Xebera bi rojan dolabê cemedî de tepiştiyê meyitê Cemîle Çagirga, Nisêbîn de kiştişê dayika 5 domanan Selamet Yeşîlmen, kiştişê dayika 57 serrî Taybet Înan ke bedenê ci 7 rojan kuçeyanê Sîlopya de ame veradayiş, dîmenê Şirnex de cenazeyê Lokman Bîrlîkî pey panzeran de kaşkerdişî DÎHA dî û pêrokîn dinya rê vila kerd. Cêrzemînê Cizîr de kiştişê 200 kesan DÎHA bare kerd.
Rojnamegerîya aştîyane
Ajansa Xeberan ê Dîcle herzewbîn xeberê dûştê herbî û hetkarê haştî viraşt. 2013 de senî ke muzakereyî destpa kerdî, weşangerîyeke bi verpersîyarî kerd. Lê çi heyf ke polîtîkayê DÎHA yê haştî û dûştîbîyayîna herbî, raştê hêrişanê kesê ke herb waştî amey. 2011î de dûştê pêdiyayişanê Oslo, DÎHA û çapemenîya kurd hedef girotîya. Cemaet û AKP û 20ê Kanûna 2011î de bin nameyê operasyonê “KCK” ke dûştê çapemenîyê virazîya, 48 rojnamevanan girot û bi serran zerre de terna.
Wexto ke hêrişê AKP yê cotmeha 2015î destci kerdî, wazîya DÎHA bîro bêvengkerdiş. O çaw ra heta na het sîteya DÎHA 48 reynî bêqanûnî amê manîkerdiş. Heta nika zî xêlê muxabîrê DÎHA girotîyay. Weşana DÎHA zî bi Qerarnameyê Hukmê Qanûnî amê girotiş. La DÎHA aşkere kerd ke senî ke vizêr zey ajans ê dûştê hêriş, manîkerdiş, binçimgirewtiş, tepiştiş bêveng nêmendhi, dê ewro zî dûştê QHQyan bêveng nêmanê û va ‘DÎHA do ti wext raştîyan ra tawîz nêdo’.
NAVENDÊ XEBERAN