Bi dîmen û fotrafan hetkarînê AKP û DAIŞ bê munaqeşe rafîna çiman ver. Ê fotraf û dîmenî jî, qezayê Kilîs Elbeylî ra amey. Qezayê Elbeylî rojanê peyinan de, fekdê herkesî de bi. Çimki Elbeylî bi rojano sewqiyatê gird û hereketînê artêşa tirk rê wayirînê keyî kerdê. Bi hezaran lejker, bi seyan tanq û bi seyan wesaîtê zirxî wija bi ca bîbî.
***
Medya AKP û rayverê hukumetê AKP jî, enê hereketê lejkerîn û sewqiyatî zey çiyê vera DAIŞ mûsinayê. Îdîa kerdê ki, iyê vera DAIŞ hedreyinê mudaxeley kenê. Helbet bê AKP’ijan kesî emelê ê vatenan û xeberanê medya AKP nêkerdê. Herkes zano, wastenê esasî ê AKP, mudaxeleyê Rojawayo. Bi nameyê mudaxeleyê Suriye û DAIŞ, wazena Rojaway îşgal bikiro.
***
Ê heme hereketê lejkerîn û sewqîyatê tanq û topan û rîştinê tabûranê taybet, hedreyinê vera Rojaway yan jî tarsaynayinê Rojaway bi.Yanî kesî nêpawit û nêpaweno AKP vera DAIŞ çiyê bikiro. Çiki DAIŞ, Rojawa û Suriye de taşeroniyê AKP kena. AKP waşt û wazena bi destê DAIŞ, verniyê destkewtinanê kurdan bigiro. Coka ê çetey kerdî warî, pere û cebilxane da înan û rîştî Rojawa û Sûriye. Coka bi kamyonana tifîng û bombeyê ciya ciya rîştî û rêşena.
***
Enê heme zaniyayê. Sebebê hereketînê Kilîs-Elbeylî hedreyinê vera DAIŞ nêbi. DAIŞ wija rolê perdey kay kerdê. Name DAŞ ravêrdê, la belê rastîn de wastenê mudaxeleyê Rojaway bi. Dîmen û fotrafê ki DÎHA rojo çarşeme kerdî vila jî, eno rastîn rafist çiman ver. DÎHA bi ê fotraf û dîmenan hetkarînê AKP û DAIŞ bê munaqeşe mûsna dinya û alemî.
***
Medya azad cayo hera da dîmen û fotrafanê qalkerdey. Fotraf û dîmenî winî mûsnenê, çetey cayanê ciya ê Tirkiye ra şiyê xeta sînor ê Elbeylî. Hetê bîn ê Elbeylî binê îşgalê çeteyan de no.Çeteyê şiyê Elbeylî bê astengîn û zey şirê geyrayin, sînorî ravêrenê. Ê bi hezaran lejker, tanq û wesaîtê zirxiyê medya û rayverê AKP qalê ci kenê jî, werte de nêaysenê. Çetey jî dest û qolê şanayina sînorî ravêrenê. Xora welatijê Elbeylî jî vanê, lejkerê tirk hertim eynî çî kenê. Wexto ki, çetey ravêrê lejkerî peyser anciyenê û çimanê xo înan rê genê.
***
Quwetanê AKP eno taktîk verî Serêkanî û bado Kobanê de jî xeftina. Hewna jî her firsedî di winî kena. Xora rojê verî DÎHA dîmen û fotrafanê qalkerdey bikiro vila, ca dabi hereketînê çeteyan ê Serêkanî de jî. Nezdiyê 100 çeteyê cayanê bînan ra şiyê Serêkanî, senî ki welatijan ê ferq kerdê, wija ra remayê şiyê hetê erdê TÎGEM. Bado jî wija ra ravêrdê Rojawa. Xora a şew, êrişê en gird û zafhetin ê vera Rojawa viraziya. DÎHA bi enê 2 xeberanê xo, fina bîn ferqê çapemeniya azad mûsina û riyê lîmin ê AKP û dewleta tirk rafîna çiman ver. Spas DÎHA.
Memed DREWŞ