Doza ke derheqê qetilbîyayîşê Derhênerê Weşanî yê Pêroyî yê rojnameyê Agosî Hrant Dînkî de ameybî akerdiş, roniştişo 57. yê doze Mehkemeya Cezaya Girane ya 14. ya Stenbolî de roja dîyine de ame dîyayîş.
Roniştiş de Mudurê xeberan yê FOX TVyî Ercan Gunî pawitişê xo kerd. Gunî va ‘ma xebera şaşîya wezîfedaran viraşt’ û wina dewam kerd: “Hedefê ma netewperestî yan zî Ergenekon nêbî. Çimkî neteweperestan Dînk hedef girewt. Kesê ke xebera Ergenekonî viraştî, înan ra yewe zî nêame mehkemekerdiş. Ti kes şarî ra ozrê xo nêwaşt. Fotografê Ogun Samastî 22ê Çileyê 2007î de rojnameyê Vatanî de ame weşênayîş. Dîmenê 44 sanîyeyî bi kargo ame ma rê. Seba ke tayê rojnamegerî mi kerdî hedef, ez yena mehkemkerdiş.”
Pawitişê Gunî ra dima heyetê mehkeme mabên da roniştişî û dima ra do Tuggeneralo kehen Hamza Çelepoglu pawitişê xo bikero.
MA - STENBOL