Waxtêde pêro “şoreşger” bî. Nika Dersîm de biyê dimokçikvanê CHP. Nî “şoreşgerê” kanî û sernêkewteyî Dersîm de biyê xizmetkarê partiya qetilkare yê Dersîm. Nînan ra tayîne ejat dî, taye hepisxanan de mendî. Dêk û kalikê nî dimoçikvanan 38 de hetê çena Ataturk, Sabîha Gokçen ra ameyî bomba kerdene, esketan de ameyî axu kerdene. Dimoçikvananê CHP kerdîsê na partiye xo vîra kerdê, Dersîm de seweta CHP gureyenê.

Hen oseno ke ni “şoreşgerê” kelxî mezg ra zi biyê kelxî. Tertelê sarê Dersîm xo vîra kerdo, Kemal Ataturk û Kemal Kiliçdaroglu dima sonê. Tansu Çîller dewê Dersîmî dayî bomba kerdene jiyar û diyarê Dersîm vêsnayî, Kamer Genç lewê aye de bî. Nî “şoreşgerê” kanî û nêweşî nika bi Kamer Genç ra piya jû cile derê. CHP tevera MHPyîz nêverdayî, nî “şoreşgerê” kelxî nika ebi nî MHPyîzan ra piya aynî partiye rê cariyenî kenê. Kemal Kiliçdaroglu bî selamê MHP raştiya taye dersîmizan vete werte.
Tayê dersîmiz kî sonûsodir jê bilbile wanenê vanê “zonê ma, zonê ma” biye lal. La nika Dersîm de poşt danê namzetê partiya Ataturk, Bahtiyar Aytaç û vanê “mara en nejdî” o yo. Ez bi xo Bahtiyar Aytaç nasnêken, zazakî zoneno, nêzoneno aye zî nêzonen. Hama ez CHP nasken û zonnen ke, na partiye zonê mayan de perverde nêwazena, niya zazakî zî qebul nêkena. Kemal Kiliçdaroglu bi xo çond reye vat “zonê mayan de perverde nêbeno, welat beno pirtleyî.” Nî “şoreşgerê” kelxî zonê xo de zî samîmî niyê, zur kenê, raştiye de zonê xo nêwazenê. Rindke nika weçînîtîs esto û nî sextekarî vejînê werte.
Ma seweta Dersîm xoserîya demokratîk wazeme û seweta na wastîsê xo dewleta tirkî de dame pêro. Nî dimoçikvanê CHP seweta Dersîm çi wazenê? 2 asmî ra avê îdarekaranê BDP namê Dersîm peyser da ci. Tabela belediya vurnê, Tuncelî kerd Dersîm. A roze zî onca heskerdoxanê sexte yê Dersîm ra veng nêvejiya. Çike raştiye de namê Dersîm zî qebul nêkenê, çike partiya xo CHP Dersîm qebul nêkena.  Wastena nî “şoreşgeranê” kelxî îzole kerdena Dersîm ya.
Taye nustoxanêke 38 ser kitavî nusnê, tey hoviya Ataturk û CHP anera zon, nika lewê CHP derê. Nî vanê “CHP, CHP ya kane niya.” Mordem gune reye xora pers kero. Çikê CHP vuriyo? Ataturk sarê ma yê Qoçgîrî qetil kerd, leborîna xo nêwaste. CHP 38 de Dersîm tertele kerd, leborîna xo nêwaste. Parlamenteranê CHP seweta îdam kerdena Denîz Gezmîş rey da, leborîna xo newaste. Maraş de alevî ameyî qirkerdene, CHP hukumat de biye, leborîna xo nêwaste. Na CHP çikê xo kerd newe? Hata na roze CHP teyna serokê xo kerdê newe, zovîna tewa newe nêkerdo.