Çeteyanê DAIŞ ke dewleta Tirk ra desteg girotî aşma Cotmeh 2014î ra tepya eştî sûka Rojawayê Kurdistan Kobanê ser. La Kobanê bi rihê fedaî, bi xoverdayişekê gird cewab da çeteyan û sûka xo xelesna. Ser vengdayişê kesayetanê namedar yê zey Adolfo Perez Esquîvel û Prof. Noam Chomsky 1ê Mijdare zey ‘Roja Kobanê yê Dîna’ amê qebûlkerdiş. 1ê Mijdare 2015î de Awrûpa ra heta Emerîka ya Latîn 400 navendan de bi des hezaran însanî seba ‘Roja Kobanê yê Dîna’ vejyay meydanan. Emserr zî ‘Roja Kobanê yê Dîna’ de her ca açarnîya Kobanê. Sûkanê Almanya de zî Kurdistanijî û dostê ci xêlê sûkan de meydanan de bî. Sûka Almanya Koln de ver Dêra Dom de Kurdistanijî are bî û xoverdayişê YPG/YPJ selamî kerdî. Nûmayişkaran sloganê zey “Biciwe xoverdayişê Kobenê”, “Biciwe xoverdayişê YPG/YPJ” berz kerdî.
AKP rê nêrazîbîyayiş
Hîldesheîm de zî Kurdistanijan bi Antîfa û bi kobanê çep yê zey SDS rayşîyayişeke viraştî. Bi seyan nûmayişkarê ke ver Îstasyona Tren de are bî bi pankarta selamîkerdişê xoverdayişê Kobanê destpa rayşîyayişî kerdî. Nûmayiş de derheqê xoverdayişê Kobanê û herzewbîn tepiştişê Hemşaredaranê Sûka Pîl yê Amed Gultan Kişanak û Firat Anli de vilavokî kerdî vila. Rayşîyayişî ra dima ver bana Şaredarî de mitîngeke virazîya. Bi qisey û sloganan hêrişê AKP yê dûştê çapemenî û şaredarîyanê kurd rê nêrazîbîyayiş damûsnîya. Sûka Almanya Bremen de zî seba ‘Roja Kobanê yê Dîna’ rayşîyayiş û mitîngeke virazîya. Kurdistanijî ver Îstasyonê Tren ra heta Parlementoyê Eyalet ray şî. Rayşîyayiş ra dima mitîngeke virazîya û hayr ancîya sereştişanê dewleta tirk yê verra Rojawa ser. Mitîng de herzewbîn beyanatê Buroyê Aştî yê Cenî, yê Komîteyê Paştdayişê Kurdistan, YNK, yê Partîya Komunîst ê Alman û yê komanê çepger wanîya. Pêrokîn mesajan de vajîya ke xoverdayişê Kobanê seba pêrokîn dîna nimûneyo. Ciwanên Azad zî veng da pêrokîn gencan ke her cayê Awrûpa de dûştê faşîzmî nêrazhibîyayişê xo damûsnê.
Kobaê omidê bindestan o
Xêlê sûkanê Fransa de zî bi wesîleyê ‘Roja Kobanê yê Dîna’ Kurdistanijî vejyay meydanan. Sûka Başûrê Fransa Toûloûse de ser vengdayişê Navendê Civaka Kurd Meydanê Capîtol de nûmayişeke virazîya. Bername de beyanatê CDK-F ame wendiş û hayr ancîya muhîmîya xoverdayişê Kobanê ser. Temsîlkarê Partîya Antîkapîtalîst a Newî Pierre Granet qisey kerd û ard ziwan ke Kobanê seba bindestan ‘omid’ o. Granetî herzewbîn aşkere kerd ke Kobanê taritîye Rojhelatê Mîyanî de bi tîj û omid û va, Kobanê dûştê barbarîzmî de herbê însanîyetî, dûştê feodalîzmî herbê femînîzmî yo. Pierre Granet dîyar kerd ke Kurdî senî ke vizêr Kobanê de xover day, ewro zî dûştê qeyûmanê dîktatorîya Erdoganî de danê xover. Granet veng da Fransa ke desinde abi pîyakarîya dîktatorîya Erdoganî ra fek verado, PKK lîsteyê teror yê Awrûpa ra vejerîyo, Ocalanî ra pîya pêrokîn tepişteyê sîyasî serbest veradîye.
Ser nameyê Rayşîyayişê Cenîyan yê Dîna Marîe Therese zî tepiştişê Ayla Akat Ata rê nêrazîbîyayiş damûsna. Sûkanê bîn yê Fransa Montpellîer û Lyon de zî bi rayşîyayişeke bi meşaleyî Roja Kobanê bimbarek bî. Nûmayiş de derbeya qeyûm yê AKP protesto bî.
‘DAIŞ-Tirkîye; Kurdistanî terk bikerê’
Jew cayo bîn ke ‘Roja Kobanê yê Dîna’ bimbarek bî paytexta Awûstûrya Vîyana bî. Kurdistanijê ke Meydanê Museûms Quartîer de are bî û bi meşaleyan heta ver Parlementoyê Awûstûrya ray şî. Dima ra mitîngeke virazîya û xêlê temsîlkaranê dezgehan mesajanê xo ardî zon. Herzewbîn bi seyan vilavokî amey vilakerdiş.
Paytexta Danîmarka Kopenhag de zî coşê Roja Kobanê yê Dîna’ meydanan de ame ciwîyayen. Kurdistanijî û dostê ci ke Meydanê Îsrael Plads de are bî bi slogananê ‘Biciwe Xoverdayişê Kobanê’ rayşî. Nûmayiş de rîwalê sereştişanê AKP bêvengîya welatanê Awrûpa rê nêrazîbîyen damûsnîya. Bername de hunermendê Kurd Dîyar Kalan, Koma Eftelya û Fûat Talayî dêyrî vatî û goveng amê giroten. Sûka Hollanda Den Haag de zî Roja Kobanê semta Schilderswijk de bimbarek bî. Şêligî bi dawil û zirne, bi slogananê ‘DAIŞ-Tirkîye; Kurdistanî terk bikerê’ destpa rayşîyayişî kerdî. Dima ra şêlig şi Navendê Civaka Kurd û bi wesîleyê roj aktîvîteyeke viraşt.
‘Kurdan het denime’
1ê aşme de zî sûka Îtalya Modena de, Meydanê Plazzo della Museo de ‘Roja Kobanê yê Dîna’ bi coşeke gird bimbarek bî. Bi seyan kesê ke tewrê bimbarekîn bî xoverdayişê Kobanê selamî kerdî. Parlementera verî û dosta Kurdan Angela Belleî ke tewrê bimbarekîn bî aşkere kerd ke dûştê faşîzmê dewleta Tirkîye de iyê dê Kurdan het de ca bigîrê.
Sûka Awûstûrya Graz, yê Îtalya Toronto, Paytexta Îspanya Madrîd, sûka Swîsre Zurîh, Lozan, Bern, Basel, Paytexta Norveç Oslo, sûka Swêd Orebro, sûkanê Almanya Essen, Berlîn, Heîlbronn, Dusseldorf, Hambûrg, Mönchengladbach, Meckenheîm, Mûnîh û Paytexta Yewnanîstan Atîna de 1ê Mijdare ‘Roja Kobanê yê Dîna’ bimbarek bî û xoverdayişê Kobanê ame silamîkerdiş.