Semedê destkewtanê kurdan têk berê ne merdimahî, ne zî sînoranê ke înan bi xo viraştê nas kenê. Weçînayîşê emserrî de gama AKPî anya ke kurdî ko bi ser bikoyê dest bi provokasyonan kerd û mîyanê verdewamîya weçînayîş û dimayê weçînayîşî de domnayî û peynîya ay serebûtan de bi desan şarê ma ameyî şehîdkerdiş û bi seyan birîndar bî. La şarê ma yê Amedî û yê şaristananê bînan pîya semedê xatirê ke bandorêke negatîf weçînayîşî ser de nêvirazo û HDP bendawe derbas bikero. Semedêke peynîya şerî bêro û aştîyêka hetê şarê kurdî û heme şaran ra yena waştişî pêk bêro êşê şehîd û birîndaranê xo da hetêke û nêverda ke o hêrsê înan bibo semedê kaosî û xirakerdişê weçînayîşî. Coka gureyêke muhîm kewto serê milê wekîlanê ma. Lazim o wekîlê ma bi vepersîyar tê bigeyrê û heyfê şehîd û birîndaran bi xebat û serkewtişanê xo yê qade sîyasî û dîplomasî de bigîrê. Û lazim o ke ey zor bidê dewlete ser ke lez bi leze tecrîdî rayberê şarê kurdî ser wedaro û cîranîya kurdanê Rojawanî qebûl bikero.
Dimayê serkewtişê kurdan ê weçînayîşê wekîltî de gama Rojawan de zî bi destkewtişê Girê Sipî şarê kurdî bi ser kewt dagirkerî zêdetir çimesûr bî û bi têgeyrayîşêke teberê merdimahî kome hovanê DAIŞî şirawitî hemwelatijê ma yê Kobanê ser de û înan ser de qirkerdiş pêk ard. Helbet dest ra şîyayîşê Girê Sipî tersê cîrantîya dewletêka kurdan zerrey înan de zêdna. Xo ra Serokkomarê Tirkiye mexsedê xo ard ziwan ke bedelê ey çi beno wa bibo ko nêverdê kurdî înan rê bibê welatê cîranî. Bi ay awayî kîna xo ya hemverê şarê kurdî da zanayîşî. Ma vînenê ke Erdogan û hêzê zey ey wazenê Rojawan dagir bikerê û semedê kerdişê xo zî zemînê mîyannetewî de meşrû bimojnê ra kewtê mîyanê xebata dîplomasîye. Pêwa enî heme rewşan eke kurdî wazenê birasê mafanê xo yê bingehînan gereke hetê dîplomasî de xo xurt bikero. Gereke ma nêkerê xo vîra ke eke wextê Pêameyîşê Sevrî de dîplomasîyêke ma ya xurte goreyê ay wextî de bibayne ko eyro roj kurdî cayêke baştir de bibayne û ancî ma zanê ke çarperçekerdişê welatê ma, şaristanêke Ewropa (Lozan) de û serê masa de bi rayîrê dîplomasî pêk ame.
Ma zî gereke bieşkê hem hesabê a neheqîya ke li şarê ma bîya welatê sebeban ra biwazê hem zî bieşkê mafanê xo pey ra bigîrê.
Semedê ay awayî zî lazim o ke ma lîngêke rewtir dîplomasîyêke xurt e awan bikerê. Rewşa ke kurdî tedeyê zî dîplimasîyêke xurt e rê akerde ya. Lazim o kurdî bizanê enî firsendê tarîxî ke kewto înan dest baş bi ca bîyarê û cayê xo mîyanê welatanê dinya de bigîrê.