Otogar 10 serre vere amebi viraştiş. Sereka Daîreya Averberdişê Çimeyan Zehra Demîr îzeh kerd ke xebatê Termînalê Mîyanşaristanan yê Amedî (DÎŞTÎ) dewam kenê û vat: “Ma wazenê semedê raywanan cayêko rind biviraze. Heta otobusê înan warzenê wa cayêko rind de boya xo bidî û wextêko weş bivîyarnî.”
Şaredarîya Şaristano Gird a Amedî, DÎŞTÎ ke serra 2000’î de temelê ci ame eştiş û serra 2005’î de erzîya falîyet 10 serran ra dima newe ra virazyena.
Honza susî wexto ke DÎŞTÎ ame viraştiş nêameybî şuxulnayîş par erzîyabî falîyet. Nika dormarê awanî newe ra yeno boyaxkerdiş. zemîn yeno cîlakerdiş, tefrîşat, tuvalet, refuj, peyzaj û rayî zî yenê newekerdiş. Xêzê parka otobusê taybet û peronê otobûsê raywanan newe ra yenê antiş. Kerrayê payarayan zî yenê boyaxkerdiş. Humara xebatkarê pakî, erebe û xebatkarê asayîşî zî yenê zêdekerdiş.
Xebata restorasyonî hetê Serekîya Daîreyê Averberdişê Çimeyan ya Şaredarîya Şaristano Gird ra virazîyena. Beşê eleqedar ê şaredarî zî mîyanê nê karî de yî. Tîya de zî sey Binerdê Ofîsî vilikê dêsî yenê ronayîş.
Newe ra boyax kenî
Sereka Daîreyê Averberdişê Çimeyan Zehra Demîr, derheqê xebatan de malumat da û vat: “No termînal nêzdîyê 10 serre yo yeno şuxulnayîş. Lazim bi ma newe ra biviraştênê. Çend serrî ke zerrîya Otogarî nêamebi boyaxkerdiş. Ma hem zerre hem zî teberê Otogarî boyax kenê. Ma eşkenê vaje ser ra bin ma Otogar newe ra virazenê.”
Otogarê qezeyan
Demîr îzeh kerd ke Otogar de meseleya pakî û asayîş de problemî estibî û wina vat: “Na mesele de zî xebatê ma estê. Ma wazenê her tewir otogar temam bike. Ma semedê pakî xebatkarê pakî zêde bikîy. Ma semedê asayîşî zî humara kamerayan zêde kenê.
Demîr tewr peynî zî îzeh kerd ke semedo ke wa trafîkê wesayitan rehet bibo kişta DÎŞTÎ de Otogarê qezayan ê Rojawan yeno viraştiş û xebatê nê otogarî dewam kenê.
AMED