REBAZ HESEN / SEYÎT EVRAN / ANF / SILÊMANÎ
Kongreya Neteweyîya Kurdistanî (KNK) heta nika hertim seba pêardişê yewîya neteweyî, viraştişê kongreya neteweyî, têhetardişê partîyê sîyasî û rêxistinan xebatî kerdî. KNKyî hertim seba xo çareserkerdişê problemê ke mîyanê partîyê sîyasî û rêxistinan de estî, kerdo amanc û na çarçewa de xebatî kerdî.
Babete ser o Hemserekê KNKyî Rêbwar Reşîdî qisey kerd û derheqê xebate û plananê xo melumatê muhîmî dayî. Hemserekê KNKyî Reşîdî dîyar kerd ke KNK ser prensîban de ameyo awankerdiş û wina va: “Cok ra ganî ma bi hawayo hîra bigîrî dest. Ma xebatanê xo goreyê tayê plan û programan bikerî. Ma derheqê qezencanê şarê kurdî de fikirîyenî. Nê qezencê seba şarê kurdî baş î yan zî xirab î ser o munaqeşeyê ma benî. Munaqeşeyan ra dima ma derheqê ‘gelo ma nê çîyan senî şênî bierzî faelîyet’ ser o vindenî. Seba çîyo esasî menfîetê çar parçeyê Kurdistanî yo. Ge-ge ma menfîetê yew parçeyî vejenî aver, labelê ma dîqet kenî ke qezencê nê parçeyî vernîya qezencanê parçeyanê bînan de nêbo asteng. Ma konferans, semîner û sewbîna goreyê nêyî kenî.”
Reşîdî dewamê qiseykerdişê xo de wina va: “Kurdistan hetê bawerî, kultur û şaran de dewlemend o. Labelê tayê hêzî nika hewl danî bawerîya sunîye bivejî aver. Labelê çîyêko winasî şaş o, çimkî ganî heme dewlemendîyî bivejyî aver. Çimkî karê ma o yo ke ma heme kurdan bîyarî têhet. Xora dişmenê ma her hetî ra ma kurdan parçe kerdî. Cok ra ganî şarê ma no het de hesas bibo. Sey nimûne, ganî heme partîyê ma yê sîyasî vera Qendîlî de rêze bigîrî û Qendîl zî înan verik bikero. Çimkî Qendîl merkezê şorişgêran o. Ganî Vakur, Başûrî ra agahdar bibo, bizano ewja de se beno. Çimkî ewja de hukmatê Iraqî bi heme hêzê xo hêrişê Başûrî keno. Kurdî kura de benî wa bibî, ganî qelbê kurdan seba yewbînan bido piro.”
Reşîdî qala kerdişanê KNKyî kerd û wina va: “Ma xebatanê xo de hîsê neteweyî û têkilîya neteweyî domnenî. Ganî ma nînan pê bîyarî. Çimkî ma heme neteweyêk î. Ma bi şarî danî famkerdiş ke partîyê sîyasî û rêxistinî hêzê motorî yê komelî yî. Labelê tayê partîyê sîyasî wina nîyî. Çimkî ê zirar danî menfîetanê şarî.”
Planê ma de konferans û komxebatî estî
Reşîdî qala plananê KNKyî zî kerd û wina qedêna: “Serra 2018î serra xebate ya. Serra ke tayê karê muhîmî paweyê ma yî. Programê ma de esto ke ma zaf konfrerans û komxebatan bikerî. Ma hedef kenî ke serra 2018î bikerî serra ke yewîya neteweyî pê bîyarî. Ma plan kenî ke derheqê Rojhelat, Vakur, Başûr û Rojawan de konferansan bivirazî. Reyna derheqê kurdê êzidî û feylîyan de konfrensan bivirazî. Reyna planê ma de esto ke ma Ewropa de tayê konfrensan bivirazî.”