Qezaya Nisêbînî ya Mêrdînî de demêko derg qedexeya tebervejîyayîşî û pêrodayîşî dewam kerdî. Badê ke qedexe wedarîya, rijnayîş dest pêkerd. Şarê Nisêbînî vera rijnayîşî de agêra keyeyanê xo. Nika 4 taxanê Nisêbînî de viraştişê awanîyê TOKÎ dewam keno.Keyeyê ke nêwazenî bananê xo bidî TOKÎ, vera rijnayîşî de xover danî.
Bitaybetî taxanê Firat û Yenîşehîrî de keyeyê ke agêrayî keyeyanê xo û vera rijnayîşî de vindenî, hetê dewlete ra bêawe û bêcereyan yenî verdayîş. Heto bîn ra keyeyê ke bananê xo newe ra viraştî zî bi tehdîdê rijnayîşî têrî yî. Babete ser o cinîyê ke agêrayî keyeyanê xo qisey kerdî. Cinîyan va ‘badê hewldayîşê bi aşman awe dîyaye ma’ û wina dewam kerdî: “Labelê nika şaredarîye her şan de rijnayîşan kena mehne û awe û cereyanê ma birnena. Ma mexdur î. Ma newe ra agêrayî keyeyê xo, labelê seba ke ma keyeyê xo ra bivejyî, çi destê înan ra bêro kenî. Wexto ke ma newe agêrayî taxe, ma bi aşman bêawe mendî. Ma nêzanî se bikerî. Seba ke ma cayê xo ra bivejî, wina kenî.”
Şar nêşêno
Nisêbînijî tena bêawe û bêcereyan nînî veradayîş, heto bîn ra her şan de polîsî erzenî keyeyan ser. Welatîyî dîyar kenî ke nika 3 kesî zî tepişte yî. Seba ke her şan de polîsî taxan de gêrenî, şar nêşêno bivejîyo teber. Kesê ke keyeyanê xo newe ra viraştî, nêşênî dêsê bexçeyê xo bivirazî û nê kesî dîyar kenî ke qayûm destûr nêdano. Cinîyî dewamê qiseykerdişê xo de vanî ‘selahîyetdaran ma ra vato, ganî şima bexçe û dêsê bexçeyî nêvirazî’ û wina dewam kerdî: “Sey ke ma zozanan de bicuyî. Ma texmîn kenî ke do hemînan birijnî, cok ra nêverdanî ke ma dês bivirazî. Labelê no seba ma hîna baş o; çimkî mabênê ma û cîranan de ti astengî çin o. Kinitişê xendekan ra tersenî.”
Darêx daxî çin a
Kesê ke vera rijnayîşî de cuyayîşî newe ra rêxistine kenî, raştê tehdîdanê polîs û xebatkaran yê ‘Do dore bêra şima zî’ yenî. Her çiqas ke rijnayîş esto, reyna zî şar dîyar keno ke ê qetîyen reyna keyeyê xo nêverdanî û ê do vera kepçeyan de xover bidî. Mîyanê roje de germayî vejîyena heta 55 derece û destûr nêdîyeno ke welatîyî darêk daxî ronî. Taxê ke heta nika bi seyan darî ameyî birnayîş, bîyî sey çole û tena çîmento erzîyeno.
ŞÛJIN/MÊRDÎN