EZÎZ ÎSMET / ARGEŞ ŞENGALÎ / ANF / ŞENGAL

  

3ê Tebaxa 2014î de çeteyanê DAIŞî hêrişê Şengalî kerdbîy û bi seyan kesan qetil kerdbî û bi hezaran cinî, doman û kesanê bînan zî remnaybî. Bi wesîleya nizdîbîyayîşê Serrgêra 3. ya Fermanê êzidîyan Endamê Asayîşê Êzidxanî Xidirê Şîyar El Esedî qala vîrardişanê xo kerd.El Esedî va ‘çeteyan sifteyîn vera xo dayî Sîba, şarê Sîba heta serê sibayî xover dayî, labelê seba ke îmkanê înan çinêbî, ê xo tepîya antîy’ û wina dewam kerd: “Ma piştîya xo PDK ra girê daybî û ma vatêne ‘dinya zî xira bibo, ê meterîsanê xo nêteriknenî’ labelê heta ke ma xo hesîyayî, ma dî ke înan ma rotî çeteyan û mîyanê xo de peyman îmze kerdî. Nê semedî ra bi hezaran kesî kewtî destê çeteyanê DAIŞî.”


Ma xebere daybî

El Esedî qiseykerdişê xo de qala zehmetîyê ke antî kerd û wina va: “Wexto ke ma ca û warê xo ra vejîyayî, ma vera xo da koyan û ma 9 rojan koyan de mendî. Ma xeylê zehmetîyan antî. Şar rezîl bî; nane û awe çinêbî ke ma biwerdê û bişimitênê. Dayîkî mecbûr mendî ke domananê xo yê verika xo de bierzî, bi desan extîyarî ê rayîran de merdî. Tayînan ti lazimîyan nêgirewtbîy hetê xo. Wexto ke dewê sifteyînî raştê hêrişî ameybî, xebere daybî dewanê bînan ke nê çeteyî senî merdiman qetil kenî û cinîyan xo reyde benî, yê bînan ra vatbî.” 


Saya Şerwanan de planî nêamyî ca

El Esedî va ‘wexto ke ma eşnawit ke rayîr abîyo, ma zaf kêfweş bîy’ û wina domna: “Wexto ke ma Şerwananê Azadî dîyî, cuye çimê ma de reyna roşn bîye. Ma koyan ra heta sînorê Sûrîye bi lingan şîyî. Ma nêzanî senî başîya şarê Rojawanî vajî. Ê ameyî vernîya ma û bi heme îmkananê xo hetkarîye dayî ma. Kesê ke şîyî Başûr, kewtî bin zulmê PDKyî. Her çiqas ke ma waşt ma xo zulmê înan ra xelas bikerî, labelê şarê ma ferqê îxanetê înan de nêbî. Wexto ke ma waştêne ma Başûr de çalakî bivirazî, ma ameyênê tepiştiş. Waştî zulmê DAIŞî Başûr de bidomnî. Labelê saya şerwananê Rayber Apoyî planê înan nêameyî ca.” 

El Esedî peynîya qiseykerdişê xo de veng da şarê êzidî û wina qedêna: “Wa şarê ma bawerîya xo ti kesî rê nîyaro û vera xo bido xoverdayîşê Şengalî û vera hêrişan de bibo cewab. Ganî ma ciwanî destê xo bidî yewbînan û ma destûr nêdî zulmî rê.”