Teşebusê derbe ra dima bi îlanbîyayîşê OHALî Qerarnameyanê Hukmê Qanûnîyan (KHK) reyde heta nika bi sehezaran merdimî karî ra ameybî îxraçkerdiş û bi hezaran sazî û dezgeyî zî ameyî padayîş. Nê hêriş û padayîşan ra sazî û dezgeyê çapemenîye zî para xo girewtbîy. Çiqas sazî û dezgeyê çapemenîye yê muxalîfî estî, hema vaje heme ameybî padayîş.
Tewr peynî vizêr saetanê sibayî de KHKyêko newe yo ame weşênayîş û çarçewaya nê KHKyî de Ajansê Dîhaber, rojnameyê Şûjin û Rojeva Medya ameyî padayîş. Sey ke yeno zanayîş rojnameyê Rojeva Medya rojnameyêko tena bi kurdî weşanê xo keno bî û rojnameyê Şûjinî zî tena rojnameyêkê cinîyan bî.
Babete ser o ajansê Dîhaberî îzehetêk da. Ajansê Dîhaberî îzehetê xo de wina vato: “Ma 14ê Teşrîna Peyêna 2016î de bi şîarê ‘Raştîyî do tarîtîye de nêmanî’ dest bi weşanî kerdbî û ajansê ma bi KHKyo ke saetanê ereyî de ame weşênayîş, padîya. Îqtîdaro ke bi OHAL û KHK estena xo domneno, ancax şêna 9 aşmî vera weşênayîşê raştîyan yê Dîhaberî de xo bigîro. Mîyanê nê prosesî de 15 reyan keyepelê ma yê înternetî ame qedexekerdiş, xebatkarê ci ameyî tepiştiş, tewqîfbîyayîş û raştê hêrişan ameyî. Labelê reyna zî ma kulturê çapemenîya azade donma û nêyî ra tavîz nêda.”
Bi seyan mehneyê îqtîdarî estîy
Dîhaberî dewamê îzehetî de wina vato: “Rojnamegerî bi destê îqtîdarî sey ‘îtîrafakarî, îftîrakarî, tetîkkêşî û birnayîşê raconî girîya dest, vera nêyî de Dîhaberî rojnamegerî do senî bêro kerdiş, hemînan nîşan da. Îqtîdarî saetanê serê sibayî de ameyî padayîş û bi no hawa mesajê ‘ma nuştişê heqîqetî, bîyayîşê vengê komelî û yê bînî ra eciz î, ma nêyî nêwazenî’. Seba padayîşê rojnameyê bi desan mehneyê îqtîdarî estî.”
Dîhaberî îzehetê xo de bale antî xeberê ke heta nika ajansî de ameyî weşênayîş ser û îzehet wina dewam kerd: “Newroza 2017î de Kemal Kurkuto ke bi mehneya ‘bombeya ganî’ ame qetilkerdiş de 8 fotografê ke hetê Dîhaberî ra ameyî parekerdiş, raştî vejîyaye orte. Labelê polîsan eşt keyeyê muxabîrê ma yo ke nê fotografan antbîy. Heto bîn ra grûbê sîlehinî ke Sûrîye de şer kerdêne û senî bi hawayo rehet leşkeranê herême reyde hereket kerdêne, vet orte. Heto bîn ra fuhûşo ke kampê AFADî de bîyêne, hedîseyê Xerabê Bava û Talatê, çîyê ke ke dewa Şapatanî de bîyî, Silopî de panzer senî 2 domanan qetil kerd, hêrişê qayûman yê kulturê kurdî ser, Çalakîya grevê vêşanî ya Nurîye Gulmene û Semîh Ozakçayî, ser mezelê ermenîyan de viraştişê cayê destawan, abluqaya Sûrî, dizdêya polîsan ya Manîsa de, bi dînamît teqnayîşê Heskîfî û sewbîna… Cok ra Ajansê Dîhaberî ame padayîş.”
ANF/AMED