Xoverdayîşê Gezî 4 serran xo pey de verda. Xoverdayîşo ke o wext vilayê xeylê bajaran bîbî de zaf kesî rastê şîddetê polîsan amebî. Rojnamegerê ke hem mîyanê xoverdayîşî de bi hawayo aktîf ca girewtî û şahidîya xoverdayîşî kerdî û hem zî mexdurê ci bîy zî para xo ê şîddetî ra girewtîy. O wext nizdîyê 100 rojnamegerî hetê polîsan ra ameyî derbkerdiş û rastê heqaretê polîsan ameyî.
Reyna o wext kovarêk ame padayîş û xeylê nuşte û weşanî ameyî sansurkerdiş. Babete ser o rojnamegeran qala çîyê ke cuyaybî, kerdî.
Ganî rêxistinê rojnamegerî bibî yewe
Mudirê Xeberan yê Televîzyonê Tele 1î Gokhan Kazbeko ke o wext amebî îdîakerdiş ke medyaya sosyale ser ro fotografêk pare kerdo û nêyî ver karê xo yê TRTyî ra ameybî eştiş, va ‘mi o wext nizdîyê 1 serre û nîme karêk nêdî’ û wina dewam kerd: “O wext ma ra ame waştiş ke ma derheqê Gezî de ti xebere nêvirazî. Mi rojanê xo yê destûrî de sewbîna sazîyan rê xebere viraştêne. Mi ra vatî ‘to medyaya sosyale ser ro fotografêk pare kerdo’. 31ê teşrîna verêne de karê xo ra ameya eştiş. Nika cayê ke rojnamegerî tede xebetîyenî, zaf kêmî bîy. Ganî rêxistinê rojnamegerî bibî yewe.”
Pişta xo ra birîndar bî
Edîtoranê Ajansê Xeberan yê Etkînî (ETHA) Serdal Işik zî wextê Xoverdayîşê Gezî de dest bi rojnamegerî kerd. Işikî va ‘o wext ez bi netîceyê guleyê gazî yê polîsî de pişta xo ra birîndar bîya’ û wina dewam kerd: “Ewja de tayê embazê ma birîndar bîyî, yê ke çimê xo vînî kerdî estbîy û yê ke merdî zî estbîy. Ma şahidîya înan kerd. Nika merdim qet nêşêno rojnamegerî bikero. Êdî vatişê ‘ez rojnameger a’ daxî zehmetin o. Rojnamegerî yenî tewqîfkerdiş, sazîyê înan yenî padayîş û seba ke dewlete şima sey rojnameger nêvînena, şima nêşênî nê karî bikerî.”
Ez zaf tesîr bîya
Rojnameger Îsmaîl Altan ke wextê Xoverdayîşê Gezî de Televîzyonê Barişî de xebetîyayêne û nika rojnamegerîya serbeste keno zî wina va: “Cinîya ke cilê sûrî piradaye bîye û gaz erzîya rîyê aye, çimanê mi ver de bîye. Seba ke polîsan zaf gazê îsotî xebetna, ez zaf tesîr bîya. Gazî ver çimê mi baş nêdîyêne û o wext kesêk kewtbî binê çenganê mi û mi ardbî heta vernîya hotelêk. Rojêka bîne polîsan mudaxaleyê şarî kerd. Eke merdimî ewja de hesas tênêgêrayênê, do 1977êko newe bibîyêne. Heme cayî ra gaz erzîyayêne û ca çinêbî ma biremî.”
DÎHABER/STENBOL