Çalakîya grevê vêşanî ya Nurîye Gulmene û Semîh Ozakçayê ke bi Qerarnameyê Hukmê Qanûnî karî ra ameybî eştiş û sewba agêrayîşê karê xo daybî destpêkerdiş, roja 180. de dewam kena. Çalakgerî nika Nêweşxaneyê Zîndanê Sîncanî de yenî vindarnayîş û rewşa înan her ke şono hîna xirabêr bena.
Heto bîn ra her roje bi hawayo sîstematîk Caddeyê Yukselî yê Anqara de seba ke piştî bidîy çalakîya grevê vêşanî ya Gulmene û Ozakçayî çalakîye yena viraştiş. Çalakîya ke seba piştîdayîşî yena kerdiş zî roja xo ya 300. de domîyena. Çalakgerî her roje bi siloganê ‘ma karê xo tepîya wazenî’ çalakîye organîze kenî.
Çalakgerî sey her roje vizêr reyna seba ke Caddeyê Yukselî de vernîya Abîdeya Heqê Merdiman de îzehet bidîy çapemenîye, Ziqaqê Konurî de ameyî têhet. Labelê polîsê ke kewtişê ziqaqî bi qalxanan padaybî, nêverdayî ke çalakgerî derbaz bibîy. Cok ra çalakgeran hewl dayî mabênê Caddeyê Yukselî û Ziqaqê Konurî de îzehetê xo bidî. Çalakgeran pankartê ‘Çalakîya Nurîye û Semîhî roja 180. de ya, wa Nurîye û Semîh tepîya biagêrî karê xo’ û ‘Wa Nazîfe Onaye serbest bêro veradayîş’ akerdî.
180 rojî yo ke bedenê înan vêşan o
Na vîste de polîsan pankartanê çalakgeran dirnayî û çalakgeran heta peynîya Ziqaqê Konurî durî kerdî. Çalakgerî erdî ra ameyî kirantiş û îşkence bi çalakgeran ame kerdiş. Nêyî ver Caddeyê Meşrutîyetî de îzehetêk dîya çapemenîye û îzehet hetê kedkara rayapêroyî Alev Şahîne ra ameye wendiş. Şahîne wina va: “Ma kedkarê rayapêroyî ke şewêkê de karê înan bi KHKyan destê înan ra ameyî girewtiş î. Nurîye û Semîh 180 rojî yo ke grevê vêşanî de yî. 2 roşan o ke Nurîye û Semîh nêşênî sifreyanê xo de ronîşî. 180 rojî yo ke seba ke şarê înan mirdî bibî, ê xo vêşan verdayî. Heta ke waştişê înan bêro qebulkerdiş, têkoşînê ma do bidomîyo. Heta ke Nazîfe Onaye serbest yena veradayîş, ma agêrenî karê xo û no îşkence qedîyeno, do têkoşînê ma dewam bikero. Roşanê ma zî do rojêkî bêro nê ziqaq û caddeyan.”
Yuksel keyeyê ma yo, do rojêkê bêro
Şahîne dewamê qiseykerdişê xo de vatişê Enver Gokçeyî yê ke vano ‘Mevaje ke nêakeno, nêşeno biakero. Na vilike do rojêkê biakera. Helbet do rojêk caddeyanê ma de zî roşan bibo. Her çiqas ke nê destê faşîstî vera şarî de biwerzîyî, do nê destî rojêkê yewe bi yewe bêrî şiknayîş’ daye vîr û qiseykerdişê xo wina qedênaye: “Ma Caddeyê Yukselî sey keyeyê xo vînenî û do rojêk roşan bêro keyeyê ma zî. Ma do heta aye roje xoverdayîşê xo bidomnîy. 14ê êlule de mehkemeya Nurîye û Semîhî esta. Ma paweyê herkesî yî ke wa beşdarê mehkemeya Nurîye û Semîhî bibîy.”
ANQARA