Teyarayê artêşa tirkî dewa Roboskê ya ke girêdayeyê Qezaya Qilebanî ya Şirnex de 28ê kanûne 2011 de bomba varnaybî û netîceyê ci de 34 ciwanî merdbî. Kesê ke raştê hêrişê bombeyîn ameybî, înan ra tena Servet Encuyo 34 serreyî yo ke pîyê 6 domanan o, xelisîyabî.
Servet Encuyî qala şewa qetlîyamî kerd.
Encuyî va ‘cayo ke ci ra vanî sînor, ewja de nîşaneyêk çin o; tena tayê beton rokerdî û o hetê betonî ra Îraq yeno vatiş û no hetê betonî ra zî Tirkîya yeno vatiş’ û qiseykerdişê xo wina domna: “Nîmeyê keyeyê mi o hetê sînorî de, nîmeyo bîn zî no hetê sînorî de cuyenî.”
Qereqolî zûr kerd
Encuyî qiseykerdişê xo wina da domnayîş: “Aye şewe ma bi kêfweşî kewtî rayîr. Wextê agêrayîşî de teyarayan bombe ma ser de varnayî, her ca sey ke roj bibo, wina roşne bî. Reyna bi hukmê bombeyan ez firaybîya dûrî. Wexto ke ez ameya ser hişê xo, mi dî ke laşê heme embazanê mi parçe bîyî û erd de vilakerde yî. Mi hewl da ke ez xo bida cayêko talde, la teyarayan reyna bombe varnayî. O wext 3-4 kesê ke 100 metre dûrê ma de bî, ê zî ameyî kiştiş. Wexto ke mi bi bêtel xo resna dewijan û mi va ‘embazê mi heme merdî, tena ez menda’ dewijan bawer nêkerdêne. Çimkî qerekolî înan ra zûr kerdbî û vatbî ‘ma seba tersnayîşî bombe kerdo û ê zî remayî Başûr’.”
Waştî rişwet bidî mi
Encuyî dewamê qiseykerdişê xo de va ‘eke ez nêxelisîyayêne, o wext artêşa tirk do bi zûran serê qirkerdişî bipadayêne’ û qiseykerdişê xo wina qedêna: “Eke ez nêxelisîyayêne, o wext do cenazeyan biberdênê Malatya. Sey ke kesê ameybî kiştiş, Kampê Heftenîn û Sineht ra ameyî, do wina bivatênê. Xora seba ke ez qisey nêkera, mi ra vatî ‘ti çi wazenî, ma danî to.’ Mi zî va ez çîyêk şima ra nêwazena, ez bedelê 34 canan wazena. Qirkerdiş ra yew serre dima, keyeyê mi ser de guleyî varnayî, mi eştî hepisxane. Mi ti vatişê înan qebul nêkerd. Domanê ke ameyî kiştiş, her yewê înan wayîrê xeyalêk bî. Ez do vatişê raştîyan ra fek veranêda û heta ke kerdoxî bêrî mehkemekerdiş têkoşîn bida.”
Defterê vîrardişî de nuşteyê Tahîr Elçîyî
Serekê Baroya Amedî yo kehen Tahîr Elçîyo ke qezaya Amedî Sûr de amebî qetilkerdiş, kişîyayîşê xo ra ver, 10ê kanûna 2013 de ‘Roja Heqê Merdiman ya Cîhanî’ de seba yadkerdişê 34 kesan şîbî dewa Roboskê. Elçîyî defterê vîrardişî yê Roboskê de nuştbî û nuşteyê xo de qala israrê têkoşînî ya edaletî kerdbî. Nuşteyê Elçîyî hende hîsin bî ke hîna zî kesê ke ê defterî wanenî, ci ra tesîr benî.
Tahîr Elçîyî 2 serrî ver defterê vîrardişî de wina nuştbî: “Ma bi wesîleya Roja Heqê Merdiman ya Cîhanî de hetê şima de yî. Ma şima bi rêz yad kenî û seba ke qatilê şima bêrî mehkemekerdiş û cezakerdiş, ma do merdimanê şima reyde mîyanê têkoşînî de bibî. Tahîr Elçî /Serekê Baroya Amedî.”
OZGUR AYDIN / YAŞAR AKSU / ANF / ŞIRNEX